Siglir tar il cuntegn

Header

Video
Scola da talents «challenge»
Or da RTR dals 24.08.2017.
laschar ir
cuntegn

Surselva «Challenge» per la Scola da talents Surselva

Strusch ha l’onn nov da scola cumenzà e gia ston ils scolars da la Scola da talents Surselva a Glion far atras la notg, e quai cun il scolast. Durant 24 uras vegn lavurà, marschà, cuschinà, dentant betg durmì. Er il telefonin è tabu durant quella «challenge».

Durant questas 24 uras datti differentas sfidas da surmuntar. Cumenzà haja l’acziun cun far cumbinellas e cun staffettas da currer di il scolast Gieri Tschuor. Silsuenter èsi ir a pe sin las alps sur Siat nua ch’i è vegnì lavurà durant 4-5 uras cun schubregiar il guaud.

Là han ils scolars survegnì l’agid da Sigi Andreoli, il selvicultur da Glion. La saira vegn ì a raiver e suenter tschaina vegn marschà tras la notg cumbinà cun gieus. Durant la notg vegn dentant er servì ina schuppa chauda. A fin va la «challenge» il venderdi la damaun a las 7:00 uras cun ir a far bogn ed in ensolver a Glion.

Tenor il scolast Gieri Tschuor è l’idea da quest'acziun ch’ins emprendia d’enconuscher endretg ils scolars, da manar els als cunfins e ch’els emprendian uschia era d’enconuscher sa sezs. E lura giaja era per manar ensemen las differentas classas.

RR actualitad 17:00

Artitgels legì il pli savens

Nach links scrollen Nach rechts scrollen