Sper la staziun da Glion, sin l'areal nua ch'il nov negozi da la Migros vegn bajegià, creschiva tut a dubel la «darsvenna giganta», ina erva da tissi ch'ha perquai stuì vegnir allontanada. Il manader da construcziun da quest areal a Glion ha laschà allontanar questas chaglias tenor las indicaziuns dil chantun. Quai vul dir che la firma da bajegiar ha stuì far quellas lavurs e quai sin agen cust.
Chaglia da tissi
Sch'ina darsvenna giganta sa chatta en in curtin privat, lura tanscha i da dismetter la chaglia ed observar il terren per cas ch'ina nova chaglia avess da crescher. Sin in areal da bajegiar, nua ch’i vegn muentà terra, sto era quella vegnir dismessa. Quai per betg derasar il sem da questa chaglia da tissi. La darsvenna giganta è ina chaglia che vegn oriundamain dal Caucasus ed ha entras quai insumma nagins problems cun noss clima alpin. Il suc da la chaglia n’astga betg vegnir en contact cun la pel dil carstgaun. El fa vegnir la pel talmain sensibla encunter radis dal sulegl ch'i dat grondas plajas.
Il chantun dovra agid
Sin l'areal a Glion è la chaussa liquidada. Tenor Marco Lanfranchi da l’uffizi per l’ambient è la darsvenna giganta ina chaglia che sto vegnir eliminada. Quai vegn fatg a moda activa e passiva tar il chantun.
Annunziar sche ins vesa ina tala chaglia san ins direct tar il chantun u era tar la vischnanca. Il chantun ha numnadamain definì per mintga vischnanca in KAFIN (Kommunale Ansprechpersonen für invasive Neophyten), in lavurer communal che è responsabels e scolà per dar scleriment sur da neofitas. Il chantun cumbatta dapi passa 10 onns quellas chaglias invasivas e dovra l’agid da la populaziun ch'annunzia talas chaglias.
RR actualitad 12:00