Alla radunanza communala ha la suprastanza preschentà a la populaziun la varianta ch’il chantun propona. I sa tracta d’in studi da realisabladad ch’il chantun ha fatg. Tenor quest studi vegn il traffic manà da la via principala sur la via da Marias en l’ost dal vitg da Rabius enfin la lingia da la viafier. Da là vegn il traffic manà parallel cun la viafier enfin tar la staziun nua che la via sbucca en la via existenta vers Surrein. La suprastanza vesa questa varianta sco pussaivla, ha dentant preschentà ina varianta optimada. Empè da manar il traffic fin tar la lingia da viafier duai la via gia vegnida menada bler pli baud tras il prads en direcziun staziun. Vinavant duai era vegnir optimada la via tar la staziun. La via na duai betg ascender in tschancun per sbuccar en la via existenta. La via existenta duai vegnir sbassada uschia che la via va la finala grad ora.
I na dat betg la mitga ed il da tschintg
Ils preschents a la radunanza communala han discutà intensiv. I vegn cunzunt fatg pensiers pervi da la pendenza da la via. Gist tras il sutpassadi tar la staziun crescha la pendenza, perquai ch’ins vul sbassar la via per che pli gronds vehichels pon tras il sutpassadi. Quai saja gia ussa tais avunda l’enviern. I vegn proponì dad ir cun la via parallel cun la viafier dentant da vart sut e sur la deponia vi. Tenor il president communal, na veglia il chantun betg realisar questa varianta. Il terren d’ina deponia na saja betg stabil avunda. Auters manegian ch’i vegnia simplamain spustà la canera e la pulvra da la via tar in auter quartier. Igl è dentant era vegnì constatà che las variantas preschentadas sajan meglras che la situaziun actuala e ch’ins stoppia far in cumpromiss pertge i na dettia betg la mitga ed il da tschintg.
La suprastanza ha prendi encunter tut las opiniuns dals preschents e tschertga il discurs cun il chantun per chattar ina soluziun che cuntenta uschè bain sco pussaivel la populaziun. Quant spert ch’i dat resultats n’ha Armin Candinas betg pudì dir. La vischnanca na veglia dentant betg targlinar e guardar ch’i dettia uschè svelt sco pussaivel ina soluziun. È il project ina giada sin maisa avess quel tenor il chantun, dad esser realisà aifer 2 fin 3 onns.
Concedì plirs credits
La radunanza communala da Sumvitg ha concedì in credit da 420'000 francs per refar las lavineras a Puzzastg. Ina part da questas lavineras che protegian ina part dal vitg da Surrein e la via che maina en Val Sumvitg èn vegnidas donnegiadas l’enviern passà entras plantas ch’èn cupitgadas. Il suveran ha ultra da quai era approvà in credit da 350’000 francs per l’acquisiziun e l’installaziun da dumbraders d’aua.