Siglir tar il cuntegn
Inhalt

Surselva Chasa da tgira Tenna: Anc mancan 350'000 francs

L'uniun Tenna Hospitz sperescha da pudair cumenzar il 2019 cun las lavurs per in abitadi da tgira en Val Stussavgia. Anc n'è la finanziaziun dentant betg dal tut garantida.

Tenna cun baselgia e chasas.
Legenda: Il project per ina chasa da tgira privata a Tenna en la Val Stussavgia pudess vegnir realisà il 2019. Keystone

Ina cuminanza d'abitar per attempads en la Val Stussavgia cun la cumpetenza da tgira palliativa sco er cun accumpagnament en cas da mort, quai è la finamira da l'uniun Tenna Hospitz ch'è vegnida fundada il 2016. La sonda passada han ils responsabels preschentà il project a la populaziun, scriva la gasetta Südostschweiz. Sche tut giaja bain possia il project vegnir realisà il 2019.

Actualmain mancan anc radund 350'000 francs per pudair cumenzar a bajegiar e quels èn ils responsabels persvas da pudair ramassar fin la fin da quest onn. En tut dovra l'uniun var 2,5 milliuns francs per pudair realisar la chasa da tgira privata. Fin uss èn vegnids ensemen 632'000 francs en furma da donaziuns, emprests senza tschains ed ulteriuras empermischuns.

En il decurs da las proximas emnas duai la dumonda da bajegiar vegnir formulada ed inoltrada a la vischnanca.

RR novitads 07:00
.