Il fieu è rut ora amez il vitg da Breil en Surselva ed ha chaschunà in grond nivel da fim ch'è stà da vesair en il conturn da Breil. Ussa èsi cler che trais persunas èn vegnidas blessadas tar l'incendi. Ina dad ellas è il possessur da la chasa da 79 onns.
-
Bild 1 von 2. Il suentermezdi da las 16:00 uras è il fieu rut ora a Breil. Bildquelle: Polizia chantunala grischuna.
-
Bild 2 von 2. Curt avant las 18:00 han ils pumpiers gì sut controlla il fieu e stizzà quel. Bildquelle: Polizia chantunala grischuna.
Cun ir en segirtad è el sa blessà grevamain. El è vegnì sgulà en l'ospital a Turitg. In um ch'è vegnì en agid sco er in vischin ch'ha empruvà da stizzar il fieu e proteger sia chasa da las flommas èn vegnids transportads en l'ospital cun suspect da tissientadas da fim.
La chasa è vegnida destruida cumplettamain dal fieu. Il clavà vischin è donnegià fermamain, scriva la polizia. Ella sclerescha il motiv per l'incendi.
Faussas infurmaziuns online
Suenter l'incendi ha l'ediziun online da la «Südostschweiz» rapportà ch'ils pumpiers da Breil hajan duvrà 40 minutas enfin ch'els hajan gì aua per stizzar il fieu. La gasetta è sa referida sin in rapport d'in lectur. Quai na saja dentant betg correct, ha Maik Defuns, il cumandant dals pumpiers da Breil, ditg envers la FMR. Sch'els avessan duvrà 40 minutas per stizzar, na fiss betg mo la chasa stada pertutgada dal fieu. Era il pledader da medias da la Polizia chantunala conferma ch'ils pumpiers sajan stads en acziun e stizzavan il fieu, 15 minutas suenter l'alarm.
Alarmà l'entir corps
Sco emprim saja la gruppa d'emprima intervenziun vegnida alarmada, di Conradin Caduff, schef dals pumpiers grischuns. Il mainacziun haja immediat alarmà l'entir corps da pumpiers ed era l'auto cun stgala girabla dals pumpiers da Flem – quai cura ch'el ha vis la dimensiun da l'incident.
Conradin Caduff di era ch'ils pumpiers da Breil sajan stads fitg spert al lieu, 10-15 minutas saja in fitg bun temp per pumpiers da milissa.