«Catrina, catrina! La vusch da mes aug resuna tras la chasa, pertge è el turnà uschè baud? Damaun da perdanonza spetgain nus sco mintg'onn blers giasts. Tals dis da festa ston ins adina mussar l'agen posess. Uschia pensa almain mes aug...», uschia cumenza il raquint da Laura Schütz da Falera.
Il cudesch raquinta da duas giuvnas en l'onn 1855, pia durant ils emprims onns da l'hotelleria grischuna. Ina dad ellas vul bandunar il dachasa, l'autra sto bandunar el. Omisduas emprovan da chattar lieu en la societad. Proxima dumengia festivescha il cudesch vernissascha a Falera.
Cudesch sco lavur da matura
Scrit ha ella il cudesch en il rom da sia lavur da matura. Dentant quel n'ha betg be persvadì las scolastas ed ils scolasts, mabain er la chasa editura rumantscha ch'ha edì il cudesch cun 600 exemplars. «Schon da pitschna era quai per mai in siemi d'edir ina giada in cudesch, perquai è quai schon fitg bel ch'jau poss uss tegnair mes agen cudesch en mes mauns».
Dentant sch'ins vul esser exacts, n'è quai gnanc l'emprim cudesch. En sias regurdientschas da pli baud chatta Laura Schütz in pitschen cudischet cun il tetel «istorgias da buna notg». Cunquai che Laura aveva be tschintg onns e na pudaiva anc betg scriver sezza, ha ella dictà quellas istorginas a ses geniturs ch'han lura scrit sin palpiri ellas per Laura.
Entant che las «istorgias da buna notg» èn restadas in unicat, cumpeglia l'ediziun dal «hotel destin» 600 exemplars.