Gia oz saja la situaziun da persunal en las chasas d'attempads fitg critica. Pervi da memia pauc persunal, ha il «Da casa Val Lumnezia» apparentamain perfin stuì refusar ina dumonda d'entrar en chasa da vegls, scriva la FMR.
Bler persunal che va
En vista a l'avegnir fetschia la glieud responsabla en las chasas d'attempads quitads. Per l'ina cunquai ch'adina dapli tgirunzas e tgirunzs – en spezial quellas e quels che han in certificat professiunal – bittan la fautsch en il chanvà. Per l'autra cunquai che persunal qualifitgà giaja en pensiun.
A la tschertga da schliaziuns
Ina via per far frunt a quella mancanza fissi da collavurar pli stretg tranter las chasas d'attempads en Surselva, manegia la glieud responsabla. E l'organisaziun tetgala «Sana Surselva» è vi da tschertgar propostas co schliar las stretgas cun il persunal da tgira. Ella è vid elavurar il concept «Reit da sanadad integrada».