Siglir tar il cuntegn
Inhalt

Surselva Chascharia Breil en mauns giuvens

Dapi il matg maina Andreas Grob da Castrisch la chascharia da Breil. In pass ch’ha duvrà curaschi dal giuven da 26 onns.

Il signun Andreas Grob en la chascharia a Breil ch'el maina dapi il matg.
Legenda: Il signun Andreas Grob en la chascharia a Breil ch'el maina dapi il matg. RTR, G. Hosang

Surpigliar ina chascharia ch’elavura aifer in onn rodund 1 milliun liters latg è in pulit squitsch. I saja ina gronda responsabladad vers ils purs, declera Andreas Grob. «Sch’i na funcziuna betg, lura han ils purs in problem», di el. Responsabladad ha el dentant era per ses trais collavuraturs ch’el ha pudì surpigliar.

El haja dentant sustegn dals purs, dals collavuraturs ma era da ses bab che ha sez manà ina butia ch’elavurava e vendeva products da latg. Uschia quinta Andreas Grob da pudair manar la chascharia uschia ch’ils purs ed el sez sajan cuntents.

Dapli spezialitads

La finamira d’Andreas Grob è sco emprim da manar vinavant uschè bain la chascharia sco ses antecessur ha fatg quai. Pli tard po el s’imaginar da producir dapli spezialitads ed augmentar la vendita da tals en las butias ed a la gastronomia da la regiun.