In chasti da 40 francs ha il manischunz survegnì da la polizia communala. La summa usitada sch’in na paja betg il parcadi.
Noss collegas da SRF Espresso han mussà quest cas a Hans Giger, giurist ed expert sch’i va per il dretg sin via. Tenor el na saja quest chasti betg stà giustificà.
Il manischunz ha perfin dumandà suenter tar la cassa dal center da sport tge ch’el duai far. Tenor Hans Giger avess el anc pudì metter ina notizia en l’auto cun l’infurmaziun che l’ura na funcziuna betg. Uschiglio haja il manischunz dentat fatg ses pussaivel.
Il president da Flem, Adrian Steiger, ha prendì posiziun en chaussa e scrit ad SRF Espresso ch'il sbagl saja vegnì fatg da la vischnanca. Per ch’i na dettia en il futur betg pli cas sumegliants a Flem, vul il president communal orientar ils lavurers pertutgads co ch'i saja d’agir en talas situaziuns.