A Trin han avant duas emnas dus mats dad otg onns chattà in skelet d'ina bara ch'ha tranter 1000 e 1500 onns. Quai ha il servetsch archeologic dal chantun confermà. En il lieu da chattada supponan specialistas e specialists ulteriuras fossas.
I saja vairamain in misteri. Quest areal na saja betg stà enconuschent sco zona d'exchavaziuns, declera Christoph Walser sin dumonda da la FMR. Il lieu nua ch'il skelet è vegnì chattà è in territori spundiv che la vischnanca ha avert avant insaquants onns cun la via da quartier.
Suenter l'annunzia tar il Servetsch archeologic dal Grischun sajan ils spezialists ids a Trin per examinar pli precis il chat. Els han constatà che questa ossa tutga tar ina fossa ch'ins ha fatg aposta cun in mir da crappa. In'emprima inspecziun ha dà als archeologs indizis ch'i saja ina fossa d'ina sepultura dal temp medieval tempriv, dals onns 500-1'000. Il tip da fossa, la construcziun e co che la bara giascheva pledian per quest temp, cuntinuescha Christoph Walser.
Il skelet ha l'uffizi archeologic transportà a Cuira per inventarisar e documentar.