Siglir tar il cuntegn

Header

In toc d'ina corna d'in tschierv.
Legenda: In toc d'ina corna d'in tschierv che vegniva duvrà per chavar cristals. Servetsch acheologic dal Grischun
cuntegn

Surselva Chat extraordinari en la regiun dal Piz Tgietschen

Gia avant passa 7000 onns tschertgava l’uman cristals en las alps. Quai mussa in chat en il conturn dal Piz Tgietschen.

In chavacristals da l’Uri ha chattà en in furn da cristals en la vischinanza da la Fuorcla da Strem Sura (Stremlücke) tar il Piz Tgietschen (Oberalpstock) laina e cornas da tschiervs e chavriels. Damai ch'il chat è manaivel al cunfin cun il Grischun è vegnì lavurà ensemen cun il servetsch archeologic dal Grischun. Sco quai che l’archeolog Christian Auf der Maur ha ditg a Radiotelevisiun Svizra Rumantscha è in tal chat sin in’autezza da 2800 meters sur mar zunt extraordinari. Il chat documentescha ch’ils umans tschertgavan gia avant passa 7000 onns cristals uschè lunsch siadora en las Alps. Tenor Christian Auf der Maur è il chat da gronda impurtanza per la regiun da las Alps, damai che quel documenteschia ch’ils umans da quel temp gievan en las Alps e na stevan betg mo en la bassa.

Ils cristals vegnivan tschertgadas per pudair far londeror guaffens, declera Christian Auf der Maur vinavant. Avant passa 7000 onns vegniva il cristal duvrà sco materia prima, cumparegliabel sco ozendi il fier.

Romans gievan sur la Fellilücke

La stad passada è dentant era vegnì intercurì il territori tranter Nätschen ed il Pass da l’Alpsu. La raschun persuenter è la colliaziun dals territoris da skis dad Andermatt e Sedrun. Ins haja pudì localisar 69 lieus da chat che documenteschan tranter auter il diever dals ultims tschientaners sco alp. Spezial èn ils chats tar la Fellilücke. Là en vegnids chattadas munaidas ed in anè. Quels chats conferman la supposiziun che la Fellilücke vegniva gia duvrada als romans per vegnir da la val d’Ursera u dal pass da l’Alpsu en il nord per uschia pudair guntgir la chavorgia da la Schöllenen.

Questa stad vegn lura intercurì pli detaglià intginas restanzas da fundaments da bajetgs ch’en pertutgads da las lavurs da construcziun per la colliaziun dals territoris da skis.

Artitgels legids il pli savens

Scrollar a sanestra Scrollar a dretga