Cun ina nova purschida che sa numna Check-in rumantsch tschertga la Lia Rumantscha il contact cun persunas novdomiciliadas en las vischnancas. En il Grischun ed en Surselva han bleras vischnancas rumantschas e bilinguas gia publitgà la nova pussaivladad d'access al linguatg ed a la cultura rumantscha.
Il Check-in rumantsch da la Lia Rumantscha intermediescha enconuschientschas da basa davart il linguatg e la cultura rumantscha. Ina plattafurma online ed in fegl sgulant sco emprim contact dattan ina survista da las purschidas da cussegliaziun, curs e contacts sco era da las colliaziuns, offertas e materialias ch'ins dovra per s'occupar dal rumantsch.
En collavuraziun cun la squadra da las regiuns da la Lia Rumantscha ha Erica Cavegn-Pfister ch'è promotura regiunala da la Lia Rumantscha en Surselva concepì la nova purschida Check-in rumantsch. Ella di che la Lia Rumantscha saja fitg cuntenta che tut las 15 vischnancas sursilvanas sajan stadas prontas senza discussiun da sustegnair la nova purschida. Las vischnancas pon metter il link dal check-in sin lur paginas d'internet. Cun far attent a la purschida sustegnan las vischnancas l'integraziun linguistica da persunas che vegnan da nov ad abitar en Surselva u era en las autras regiuns dal Grischun.
L'idea da basa n'è betg nova
L'idea per crear ina plattafurma digitala per las vischnancas saja naschida avant intgins onns tar la Lia Rumantscha, di Erica Cavegn-Pfister: «Jau hai survegnì l'incumbensa da concretisar l'idea e far in project ordlonder.» A l'entschatta saja stà da far blera lavur da scleriment. La Lia Rumantscha haja sclerì l'interess en il chantun e sa saja lura messa vid la lavur da concepir la plattafurma.
«Nus avain lavurà cun la finamira da crear in pachet finì che dat uschè pauca lavur sco pussaivel a las vischnancas», di la promotura da la Lia Rumantscha en Surselva. In pachet cumpact augmentia era las schanzas ch'ina plattafurma sco il Check-in rumantsch vegnia purtada da tut las vischnancas, di la promotura.
Ina plivalur
Numerusas vischnancas sursilvanas rendevan gia pli baud attent las persunas che vegnivan da nov ad abitar a las pussaivladads d'emprender rumantsch. La promotura regiunala Erica Cavegn-Pfister di ch'intginas vischnancas faschevan quai a moda exemplarica. Autras faschevan in pau ed insaquantas na faschevan nagut. «Cun il Check-in rumantsch han tut las vischnancas in sistem unifitgà. Las persunas novdomiciliadas na ston betg ir pli qua e là a rimnar las infurmaziuns. Cun il Check-in è tut en in lieu. Quai è ina clera plivalur», di la promotura regiunala. I saja da grond avantatg che tut las vischnancas hajan ussa il medem sistem d'infurmar ils novdomiciliads.
Sensibilisar
L'emprim contact cun in nov ambient saja decisiv, scriva la Lia Rumantscha en la communicaziun da medias davart il Check-in rumantsch. Quella plattafurma procuria che linguatg e cultura dettian en egl immediatamain a quellas e quels che prendan domicil en ina vischnanca. Uschia daventia l'integraziun pli simpla, di era la manadra dal project Erica Cavegn-Pfister sin dumonda da la FMR. «Ina integraziun da bella entschatta svegli era pli spert l'orientaziun per noss linguatg e per nossa cultura.»
I dat anc auters acturs
Erica Cavegn-Pfister di ch'i dettia sper las vischnancas anc auters acturs ch'ins veglia contactar pertutgant il Check-in rumantsch. Il concept da quest pachet cuntegnia era la pussaivladad d'entrar en contact cun gruppas da persunas privatas che abiteschian da nov u parzialmain en nos vitgs. «Ina gruppa en mira impurtanta èn ils possessurs da segundas abitaziuns. Nus da la Lia Rumantscha vulessan entrar en contact sco proxim cun ils proprietaris da segundas abitaziuns per animar quels da prender part da nossas purschidas sco per exempel nos Cafés rumantschs.»
Iniziativa beneventada
La vischnanca da Trin renda attent a la plattafurma cura ch'in novdomicilià s'annunzia al spurtegl da la chanzlia. A Glion di il chanzlist communal Michael Spescha ch'els vegnian ad integrar il link dal Check-in rumantsch cun in code QR en in carnet ch'els dettian a mintga nova abitanta u nov abitant che s'annunzia tar la vischnanca. Era la vischnanca da Sumvitg ha plazzà sin la pagina d'internet da la vischnanca il Check-in rumantsch cun tut las infurmaziuns necessarias.