Chill foundation - Pussibilitar l'ir cun aissa a requirents d'asil
La fundaziun da «Chill foundation» a Laax pussibilitescha gia la terza stagiun curs dad ir cun aissa. Questa giada èn stads da la partida 30 requirents d'asil motivads. Nus avain accumpagnà els durant in di.
La bun'ura a las 8:15 vai liber a Trimmis avant il centrum da transit da requirents d'asil: 30 dad els han pudì ir la mesemna sin pista, e quai cun la fundaziun da Chill. Lezza organisescha e pussibilitescha l'emprender dad ir cun aissa a persunas che n'han uschiglio betg l'access a quest sport. Ma tut cumenza gia avant ch'ins è en la naiv. Uschia daventa era il viadi cun il bus in punct d'instrucziun.
Il program da Chill fa en tut sis dis sin pista, e mintgin ha in tema da coc. Questa giada èsi pazienza, las duas ultimas giadas era quai respect e curaschi. Las proximas giadas vegn anc a suandar persistenza, responsabladad ed era luschezza. Uschia vegn tematisà da la manadra dal program da Chill, Michaela Schmid, la valur d'avair pazienza ed il pled vegn preschentà en differentas linguas, pertge ch'ils participants èn requirents d'asil. Els ed ellas èn tranter 14 e 17 onns vegls e derivan per la gronda part da l'Afganistan, da l'Ucraina ubain era da Somalia, da l'Albania u la Tirchia. Intgins èn pir gist arrivads, auters èn gia en Svizra dapi 1,5 onns. Discurrì vegn per gronda part tudestg da scrittira ed era las duas scolastas èn vitiers.
Impressiuns sin pista
1 / 8
Legenda:
I fa plaschair
Gia il terz enviern datti il program da la Chill Foundation a Laax.
Chill Foundation / Mathyas Kurmann
2 / 8
Legenda:
Sa stgaudar
Avant ch'ils 30 participants e participantas pon propi ir cun l'aissa datti ina runda da sa stgaudar.
Chill Foundation / Mathyas Kurmann
3 / 8
Legenda:
Ed il sa stgaudar vegn fatg cun in gieu: en in grond rudè vegn u fatg in pass sanester u in dretg per pigliar l'aissa da quel/quella dasperas. Quel che lascha crudar l'aissa è ora dal gieu.
Chill Foundation / Mathyas Kurmann
4 / 8
Legenda:
Pretensius
Era l'ir cun il lift sto vegnir emprendì.
Chill Foundation / Mathyas Kurmann
5 / 8
Legenda:
Ma suenter in temp gartegia era quai meglier e meglier.
Chill Foundation / Mathyas Kurmann
6 / 8
Legenda:
Sin pista mussan quatter magisters da la scola d'aissa da Laax co ir cun l'aissa.
Chill Foundation / Mathyas Kurmann
7 / 8
Legenda:
Ed intgins pon gia ir bain da la pista giuadora.
Chill Foundation / Mathyas Kurmann
8 / 8
Legenda:
Chill Foundation / Mathyas Kurmann
E lura vai era gia liber sin pista ed il plaschair è grond. Intgins dals participants han gia pudì far part al program l'onn passà – e quai vesan ins svelt, quai èn ils snowboardists ferms che pon gia far stortas ed era franar. Tar autras u auters va quai anc pli ditg, là cumenzi gia cun la sfida dad ir cun il runal da suga. Ma la fin dal di èn tuts fitg cuntents da l'experientscha – e sa legran gia sin la proxima ediziun che vegn ad avair lieu ils 6 da mars 2024.
La «Chill foundation»
Avrir la boxSerrar la box
La fundaziun è vegnida fundada il 1995 da Jake Burton (fundatur da las aissas Burton, mort il 2019) e sia dunna Donna Carpenter. Quai cun l'idea da promover sports dad aissa era per giuvenils cun main meds finanzials. Entant è la fundaziun activa en ils Stadis Unids, il Canada ma era en Europa: en Germania, en l'Austria, l'Italia, la Tschechia sco era en Svizra.
En Svizra datti quest program dapi trais onns, pia a partir dal 2021, Laax è lieu piunier dal program e sustegn era quel finanzialmain.
