Mo trais organists
L’istorgia dal chor cumenzia atgnamain cun il chor viril Mustér, sco Giusep Capaul raquinta. Quest chor era vegnì fundà l'onn 1865; ed il chor baselgia s. Gions Mustér è daventà il 1916 ses successur. Quest chor è sa deditgà mo pli al chant sacral. In sguard en l’istorgia mussa ch’el ha gì trais organists. Gion Battesta Simonet (1916-1942), Giusep Huonder (1942-2002) e dapi l'onn 2002 Claudio Simonet. Dirigents ha il chor gì 7, l’actual è Aluis Hosang. Ils organists èn era cumponists.
Chantar cun Ivan Rebroff
Ils chantadurs èn adina puspè s’engaschads per organisar occurrenzas sco festas da chant cecilianas ubain radunanzas da l’Uniun ceciliana Surselva. Da temp en temp ha i er dà la chaschun da pudair chantar cun persunas prominentas sco il concert dal 2006 cun il solist Ivan Rebroff.
Chantar faschond oraziun
Il chor baselgia s.Gions Mustér ha da quai da 30 commembers. Giusep Capaul di ch’el haja prest chantà 50 onns en tals chors. Ad el plascha il chant sacral - quai mument ch’ins possia chantar faschond oraziun. Ed en quest vala era la devisa dal chor baselgia s. Gions Mustér sin il maletg che penda en l’aula da la chasa da scola: Deo cantamus gloriam – lain chantar gloria a Dieu.
Ina messa per orgla e tschintg instruments da sturs
Per il giubileum da 100 onns chor baselgia s.Gions Mustér ha Alvin Muoth cumponì ina messa festiva en Es. Il text liturgic ha sur Giusep Cathomas scrit. Il titel da questa ovra è: Pled e paun. La messa è per orgla ubain per 5 instruments da sturs. Dumengia, ils 20 da november, è el vegnida preschentada l’emprima giada en la baselgia da s.Gions.
Bleras emoziuns
Quai saja ina messa cun bleras emoziuns, di il dirigent Aluis Hosang. Els hajan exercità intensivamain. Gia l’avust hajan els cumenzà cun las emprovas ed i hajan perfin fatg in champ da chant ina sonda. Ad el plascha surtut il credo fitg bain, di Aluis Hosang.
Gia l'onn1996 aveva Alvin Muoth cumponì ina messa en F per il chor baselgia s. Gions Mustér.
