Fatschas traglischantas, creschids motivads ed uffants che han plaschair da chantar davant public – in zichel agitaziun inclusiva. Il Chor d'affons Sumvitg è atgnamain plitost in chor d'uffants da l'entira Surselva.
Chantaduras e chantadurs da Laax fin Sedrun fan part a quest chor che vegn dirigì da Flavia Walder e Marina Bearth. L'idea per quest concert è stada d'envidar mintgamai in creschì per uffant. Pia han ils uffants pudì tscherner tgi ch'els dumondan da chantar ensemen cun els.
Quai è vairamain stà super per mai ed ina gronda surpraisa da vesair tgi che vegn cun tgi. In mix da tuttas vegliadetgnas.
Questa idea ha funcziunà fitg bain. Il chor è daventà bler pli grond e quai en in batterdegl. Quest chor para d'avair anc bleras autras qualitads che be il chantar. Uschia descrivan ils uffants il chor sco «cool, legher, in chor che stgauda e fa plaschair».
Ir il venderdi saira mintga giada a chantar, quai è adina ina buna finiziun da l'emna.
Intgins dals geniturs èn stads per l'emprima giada part d'in chor. Ils exercizis per ils creschids, quels han cuzzà tschintg giadas. Il public ha confermà cun il ferm applaus che quella constellaziun da generaziuns è stada ina buna idea.