Siglir tar il cuntegn

Header

Navigaziun

Il «Chor d'affons Sumvitg» en acziun.
Legenda: Il «Chor d'affons Sumvitg» en acziun, els na fan betg part a la Scola da musica Surselva. mad
cuntegn

Surselva Chor d'affons Surselva vul – Chor d'affons Sumvitg betg

A partir dal avust vegn il «Chor d'affons Surselva» integrà en las structuras da la scola da musica da la Regiun Surselva. Il «Chor d'affons Sumvitg» na vul dentant il mument betg far quest pass, era pervi dals custs per ils geniturs.

Ils motivs da far il pass per il «Chor d'affons Surselva»:

  • Las gruppas èn pli pitschnas
  • Ina segunda persuna instruescha scolaziun da la vusch
  • Il chor 3 ha pli lung temp d’emprovas
  • Las dirigentas vegnan pajadas tenor lur scolaziun.

Ils motivs encunter dal «Chor d'affons Sumvitg»:

  • il concept n'è betg madir
  • uffants pajan il mument 50 francs ad onn

Per la suprastanza dal chor d’uffants Surselva n'èn ils custs per ils uffants betg in tema. Ils uffants pajan gia uss en media 200 francs e perquai saja l'augment minimal, ha confermà la presidenta Irena Winzap.

Augment da scolars per scola da musica

La Scola da musica Surselva survegn uss en ina giada quasi 60 novs scolars. Quels 60 uffants furman en l'avegnir quatter gruppas, mintgamai tenor vegliadetgna. Da nov datti duas dirigentas per il chor che vegnan pajadas da la scola da musica. L'uniun Chor d'affons Surselva, ch'exista gia dapi varga 15 onns, resta vinavant activa per organisar ils concerts, champs ed autras occasiuns dal chor che na pon betg vegnir organisadas entras la scola da musica.

Famiglia Scherrer en acziun

Las dirigentas dal chor d'uffants Surselva èn il medem mument la sora e la dunna dal manader da la scola da musica Clau Scherrer. Ma sco Clau Scherrer di saja quai betg sia preferenza, el tschertgia las scolastas ed ils scolasts tenor las abilitads e las scolaziuns e betg tenor ses cor. Ed en general na saja quai betg simpel da chattar persunas scoladas da musica en Surselva.

Jau hai adina tschertgà la meglra persuna per ina chaussa. Per mai vai per la chaussa e betg per favurisar persunas.
Autur: Clau Scherrermanader da la scola da musica Surselva

Chor d’uffants da Sumvitg na fa betg part

Gion Hosang, il president dal chor di ch’els hajan discutà lung e lad, sch’els duain sa colliar cun la scola da musica Surselva. Els na sajan dentant betg persvas dal concept, quel na saja anc betg madir. Fin uss pajan ils 75 uffants 50 francs ad onn; en l’avegnir fiss quai probabel tschintg giadas tant, di Gion Hosang. La dumonda è sch’ils geniturs fissan pronts da pajar quai.

Nus avain in chor che funcziunescha bain, e nus na vulain betg far experiments.
Autur: Gion Hosangpresident dal chor d'uffants da Sumvitg

RR novitads 06:00