Il Chor maschedà da Flond è vegnì fundà l'onn 1876. El po pia festivar quest onn ses 150avel anniversari. E la pitschna cuminanza ch'appartegn oz a la vischnanca Sursaissa Mundaun è lura era vidlonder da preparar ina digna commemoraziun.
Dumengia, ils 31 da matg 2026 envida il Chor maschedà da Flond ad in'occurrenza speziala. Il chor po numnadamain festivar ses 150avel anniversari. Ils da Flond na porschan betg mo in concert, mabain era in teater. Las duas producziuns èn integradas ina en l'autra, igl è in'inscenaziun documentar-musicala.
Terms e particularitads dal temp
La dirigenta Ursula Kobler ha preparà cun sias chantaduras e ses chantadurs in matg da chanzuns tradiziunalas e novas. Aposta per il giubileum da 150 onns dal cor da Flond ha Flavio Bundi cumponì ina chanzun tenor in text da l'anteriura scolasta Meia Inauen-Dolf. Quest toc duess sa sviluppar sco futur imni da Flond. Actualmain exercitescha il chor il program da chanzuns, vitiers è ina gruppa da teatristas e teatrists fatschentada cun tschertas scenas sco part integrala dal concert. Sco basa da l'acziun ha l'autur, il schurnalist da la FMR Andreas Cadonau, prendì la vasta documentaziun da Flond dad Andrea Darms (1925–2022).
Andreas Cadonau ed il cronist Tobias Heinisch han consultà ils documents vegls dal cor e material da l'Archiv da stadi. Els han scuvrì terms e particularitads. Fundà il chor maschedà ha Tieni Monsch (1812–1878). Oriund da Flond aveva el fundà a Strada/Glion, en ses lieu da domicil, ina scola da musica. Sur la grippa da l'Uaul Grond, en ses vitg natal, n'ha el betg mo fundà il chor maschedà, mabain era il chor viril ed il chor da dunnas. Cun treis chors èn ils da Flond sa participads a las festas da chant da lez temp.
Cun chanzuns e las scenas da teater cumparan perditgas dal temp sin tribuna. L'auditori po sa participar a l'istorgia dal vitg, a sia cultura e pitgiras economicas enfin en il temp modern. Antruras emigravan ils da Flond, dapi ch'il turissem ha fitgà pè sin il Mundaun, immigreschan hosps. A la festa giubilara dals 31 da matg 2026 vegni a dar, en quest senn, bler da rir e da surstar.