Christoph Zingg è stà blers onns tar las ovras socialas da Pfarrer Sieber a Turitg. Là è el stà manader da fatschenta. Il 2020 han las ovras gì il meglier onn da fatschenta ed uschia saja tut mess sin via. Tranter auter in nov bajetg ed er l'identitad da las ovras saja sa manifestada e sa profundada a moda positiva suenter la mort da ses fundatur. Perquai saja vegnida actuala la dumonda co vinavant e la plaiv da la Cadi, cun sia fundaziun «Tür auf – mo vinavon» saja stada la sfida ch'el veglia uss pigliar a maun, declera il plevon. Ma, er da pudair far anc insatge nov en sia vegliadetgna, vesia el sco privilegi.
Tadlar ed emprender d’enconuscher
Dapi ch’el saja uss en la plaiv haja el gia pudì emprender d’enconuscher pliras persunas, ma el saja anc adina en la fasa da tadlar ed emprender, di Christoph Zingg. En cumparegliaziun cun ses antecessur saja el era scolast da ductrina en scola a Mustér. La lavur cun ils uffants saja fitg positiva, e plirs geniturs sajan s’engaschads fitg per che quella scolaziun vegnia pussaivla, di Zingg. Era la collavuraziun cun la scola ed ils collegas saja fitg buna e quai fetschia pli simpel il cumenzament.
Lavur da giuventetgna
Ina da las finamiras saja era da promover la lavur da giuventetgna. Il mument haja el il sentiment che la lavur da giuventetgna vegn sulet vesida sco post da custs e betg sco investiziun en il futur da la giuventetgna. Quai saja in punct ch’el veglia meglierar ils proxims mais, u onns e sch’ins discurria alura da investiziun en nossa giuventetgna alura saja bler gia cuntanschì, di Christoph Zingg.