Quatter dis, da gievgia enfin dumengia, è il plaz cotschen ed il guaud sper la chasa da scola fermamain en ils mauns da la proxima generaziun da ciclistas e ciclists da muntogna. L'organisatura MS Sport porscha in curs per uffants tranter 6 e 15 onns. Ils 20 uffants emprendan da scolasts da mountainbike professiunals tut – da la savida da basa enfin ir da stgalas e sur obstachels, e tut tenor nivel er da manischar il velo da muntogna sin sendas pli pretensiusas en il guaud.
camp da velo da muntogna a Glion
-
Bild 1 von 8. Il segund di dal camp da mountainbike cumenza. Bildquelle: RTR.
-
Bild 2 von 8. Ina baterlada curt avant il curs. Bildquelle: RTR.
-
Bild 3 von 8. Check dal velo cun la guida professiunala da mountainbike, Jenny. Bildquelle: RTR.
-
Bild 4 von 8. Rundas en la dretga posiziun sin il plaz cotschen. Bildquelle: RTR.
-
Bild 5 von 8. Il parcours da far slalom per emprender da far stortas. Bildquelle: RTR.
-
Bild 6 von 8. Il proxim spetga per emprender da far stortas. Bildquelle: RTR.
-
Bild 7 von 8. In'autra gruppa è vi da far il check dal velo cun il scolast Lukas. Bildquelle: RTR.
-
Bild 8 von 8. Franar vul esser emprendì sco s'auda. Bildquelle: RTR.
Las manadras ed ils manaders dal curs repartan ils uffants en gruppas tenor capacitad e vegliadetgna. Alura datti exercizis sco far stortas cun resguardar la posiziun da la pedala – u ch'ils uffants han d'emprender la tecnica correcta da franar. La dumengia ch'è il davos di dal camp, datti lura in spetachel. Là pon ils uffants ir sur schanzas e surmuntar obstachels cun lur velos, ed uschia mussar a lur geniturs tge ch'els han emprendì durant quels quatter dis plain activitads.