Il cas
Ch'i dettia ina infecziun entaifer il circul da la scola è vegnì enconuschent il mardi avantmezdi. Sinaquai ha il stab da crisa orientà per mail tut ils geniturs dals uffants pertutgads.
Singuls geniturs hajan lura reagì, ma il stab da crisa na saja betg vegni sut las rodas cun dumondas e reproschas d'avair tralaschà insatge, manegia Duri Blumenthal il president da vischnanca e manader dal stab da crisa.
La schliaziun
La scola Lumnezia è serrada dapi il venderdis passà sco tut las scolas en il Grischun. Forsa saja quai il cletg ch'il virus en Lumnezia na sa derasia betg a moda explosiva, uschia Blumenthal vinavant.
La persuna infectada saja en quarantina. Plinavant èn era persunas che han gì contact cun questa persuna ils ultims dis restadas a chasa e vegnan observadas. Differentas persunas èn malsaunas a chasa, ins na sappia betg sche era ellas sajan infectadas. Questa controlla vegnia a suandar ils proxims dis.
Appel
L'appel dal stab da crisa è clers: Betg far panica ma pigliar serius la chaussa. Tgi che na sto betg ir ora, duai star a chasa ed evitar contacts. Quai valia surtut per persunas cha tutgian tar la gruppa da risico. La Surselva na saja betg ina insla ed ils Sursilvans na sajan betg immuns encunter il coronavirus, cumplettescha Duri Blumnethal ses appel.