Siglir tar il cuntegn

Header

Clau Schlosser
Legenda: Clau Schlosser, il nov elegì president da vischnanca da Breil. RTR, G. Hosang
cuntegn

Surselva Clau Schlosser è il nov president da Breil

Cun 459 da 515 vuschs valaivlas ha il suveran da Breil elegì Clau Schlosser sco president communal.

Clau Schlosser daventa uschia il successur da Richard Caduff che sto sa retrair suenter 12 onns sco president communal, pervi da la limitaziun d'uffizi. Clau Schlosser è stà il sulet candidat per il presidi communal da Breil. Al pur da Dardin ch’è dapi sis onns en suprastanza fa il bun resultat grond plaschair. Quai demussia che la populaziun stettia davos el e sustegnia el. Da l’autra vart saja quai era in squitsch da mussar prestaziun en quest nov uffizi. Las finamiras da Clau Schlosser è da consolidar la vischnanca. La gronda sfida saja d’empruvar da far il pussaivel per che la glieud restia en vischnanca uschia che la depopulaziun vegnia franada.

Suprastanza n’è anc betg cumpletta

En suprastanza communala è ultra da quai Pius Monn (381 vuschs) vegnì reelegì sco suprastant. Dals novs candidats han Roman Benedetg Cathomas (321 vuschs) e Martin Comincioli (318 vuschs) cuntanschì l’absolut pli. Selda Cavegn-Cathomas (212 vuschs) ha manchentà l’absolut pli per 43 vuschs. Il segund scrutini è previs per ils 14 da zercladur.

Ulteriurs gremis èn cumplets

Sper la cumissiun da quint e gestiun ed il cussegl da scola è era il cussegl da vischnanca vegnì elegì. Entant ch'ils vischinadis da Danis-Tavanasa e Dardin han giu gest tons candidats sco posts hai dà en il vischinadi da Breil-Vitg in cumbat electoral. Betg tanschì per in dils sis posts hai per Roland Deplazes.

Vischinadi Breil-vitg: Carigiet René jun. (358vuschs); Caduff Guido (360vuschs); Cathomen-Casanova Veronica (295vuschs); Cathomas Urs (220vuschs), Seiler Mario (266vuschs), Tomaschett Maurus (267vuschs)

Vischinadi Dardin (2 commembersvuschs): Cahannes Aluis (327vuschs); Derungs Pascal (277vuschs)

Vischinadi Danis-Tavanasa (5 commembersvuschs): Brunner Marcus (356vuschs); Albin Corsin (375vuschs); Sgier-Caduff Priska (245vuschs); Friberg Cassian (366vuschs); Riedi Martin (346vuschs)

RR novitads 14:00

Artitgels legids il pli savens

Scrollar a sanestra Scrollar a dretga