Pervia dal virus na vul la claustra da Mustér betg festivar Sogn Placi en la furma usitada cun parada e processiun. I dat dentant ina messa pontificala cun chant gregorian en la baselgia da Sogn Martin dumengia, ils 5 da fanadur.
Curius da far processiun cun survegliaders
Scolaras e scolars dal gimnasi sco era musicas mancan a la festa da Sogn Placi. Perquai na datti era betg ina messa cun chor ed orchester, sco l’avat Vigeli di. En vista al virus fiss quai era memia cumplitgà da resguardar tut las mesiras da segirtad.
Sch’ins sto avair policists è quai curius da far processiun sut igl egl da survegliaders.
Ina festa che collia
L’avat manegia che quai saja probabel l’emprima giada en l’istorgia da la claustra da Mustér ch'i na dettia betg ina festa cun parada e processiun festiva. Sogn Placi saja la festa che collia ils conventuals cun ils scolars, geniturs ed anteriurs, cun las uniuns e cun la regiun. Els veglian era tgirar quests contacts.
Donn che nus n'avain betg pudì far quest onn, perquai che la baselgia è renovada e l'orgla en funcziun.
Chapientscha ch'ins stoppia tegnair la dira
Era la presidenta da la societad da musica da Mustér, Theres Burri Gadola, deplorescha ch’els na possian betg far part da la festa da Sogn Placi. Els fissan vegnì gugent cun ina delegaziun cun bandiera e tamburs. Ella chapeschia dentant ch’ins stoppia tegnair la dira e proteger la glieud.
2021 vegn la festa da Sogn Placi puspè festivada il di usità dapi tschientaners, dumengia, ils 11 da fanadur.