Che la claustra ha cas da corona, ha l’avat Vigeli Monn ditg sin dumonda da la FMR. Ma els hajan fortuna en da disfortuna. Ils quatter seniors sajan vaccinads, e tar ils pertutgads sajan ils sintoms levs.
Er en ses sectur da hotellaria na po la claustra betg recepir giasts ils proxims dis. La scola che cumenza puspè ils 12 d’avrigl, na duai tenor l’avat Vigeli betg esser pertutgada. Tant en scola sco era tar ils paders e fraters magisters ed il persunal – hajan els fatg repetidamain tests il davos temp.
Igl è uss gia la segunda festa da Pasca ina suenter l’autra, che la claustra da Mustér na po betg porscher servetschs divins publics. L’onn passà aveva la claustra offrì ils servetschs divins via live-stream – quest onn desista ella da questa purschida.
