La davosa etappa da restaurar la baselgia da Son Martin è dad intunar l’orgla. Da Tschuncaisma vegn ella inaugurada.
Controllar passa 4000 fiffas
Jörg Maurer intunescha ed accordescha l'orgla, el che ha gia intunà passa 100 orglas. La finamira saja che l’orgla tunia bain, vul dir per exempel che las fiffas na dastgan betg tunar memia dad aut, memia giz ubain sgarar. Perquai ston ins controllar, per part prender ora e schubregiar, tut las 4'173 fiffas – quai è ina lavur da passa 4'000 uras.
L’orgla da la baselgia da Son Martin datescha da 1934. L’inschigner Franz Gattringer, oriund da l’Austria, ha construì ella. Sco Jörg Maurer di, haja el duvrà in nov sistem cun in portavent.
El saja stà in fitg bun inschigner ed haja empruvà d’eliminar ils sbagls da l'orgla veglia.
Plirs disturbis
Sco frater Stefan (che suna l’orgla dapi trais decennis) di, saja ella vegnida schubregiada l’ultima giada a l’entschatta dals onns 1970. Els hajan gì plirs disturbis e bleras reparaturas. Perquai saja quai stà cler, ch’ins stoppia restaurar ella.
