Claustra da Mustér vinavant a la tschertga da daners

Dapi l’atun passà sa preschenta la claustra da Mustér cun ina puntanada zugliada en ina taila alva. Ussa survegn quella puntanada anc ina inscripziun ch’appellescha da sa gidar da finanziar la restauraziun da la baselgia claustrala.

Laschar ir video «La claustra da Mustér fa attent sin la restauraziun urgenta»

La claustra da Mustér fa attent sin la restauraziun urgenta

2:01 min, dals 9.4.2015

La restauraziun da las fatschadas e da l’intern da la baselgia da la claustra, la baselgia S. Martin, custan a la claustra da Mustér var 15 milliuns francs. Sco il mainafatschenta da la claustra Peter Binz ha ditg a Radiotelevisiun Svizra Rumantscha saja quai mo pussaivel cun agid da confederaziun, chantun, vischnancas ed autras fundaziuns ed instituziuns. Ins haja fin ussa pudì rimnar fin ussa passa la mesadad da la summa, quai che saja fitg legraivel.

Appel a visitaders e populaziun

Tenor il concept per recaltgar ils daners per la restauraziun che la claustra sezza sa buc finanziar ord atgna forza vegn ussa era fatg via l’inscripziun vid la puntanada in appel als visitaders ed a la populaziun.

Sco Peter Binz vegn ins ad empruvar da pudair cumenzar 2016 culla restauraziun da la fatschada sid da la baselgia ch’è ussa davos la puntanada e cuntinuar cun las autras fin 2018. 2018 e 2019 fissi planisà da far las lavurs da restauraziun en l’intern da la baselgia.

La blatga n'ha betg propi vulì

La blatga cun l’inscripziun ha ina mesira da 20 sin 22 meters e paisa var 140 kilos. La grondezza e la paisa è ina sfida per la fatschenta che ha da montar la blatga. L’emprima emprova è stada a fin avant ch’ins ha insumma pudì fermar ella insanua. La secunda emprova è bunamain gartegiada. Il vent ha dentant fatg in stritg atras il quint e stgarpà davent la blatga avant ch’igl è stà pussaivel da fermar ella dal tut. La terza emprova da montar la blatga ha lura la finala funcziunà.