Ses num da battaisem è Laurent e quel tradischa ina connexiun cun la lingua franzosa. Cun sia empermischiun simpla en la claustra da Mustér il favrer 2022 ha Laurent Sauterel elegì la versiun latina. Dapi lura è el frater Laurentius. Il benedictin ha finì ses studi da medischina e neurobiologia. Actualmain è el amez il studi da teologia a Friburg.
Ils 8 da december 1996 saja el naschì, di frater Laurentius durant ch'el maina la visita da scola si ed en la stanza da giasts. «Igl è in bel datum, gist il di da Nossadunna Immaculata», manegia il conventual. Quai firà da Nossadunna è el naschì, ed l'emprim da schaner 1997, vegnì battegià. L'emprim di da l'onn è medemamain ina solennitad da Nossadunna. Per il conventual ha quest di survegnì ina muntada anc pli profunda. L'emprim da schaner 2021, curt suenter ch'el aveva cumplenì 24 onns, è el numnadamain entrà en la claustra benedictina da Mustér. «Jau vi viver per l'annunziaziun ed offrir mia vita a Jesus Cristus», ha el empermess il favrer 2022 en il profess simpel. Lez di ha el retschavì l'habit da benedictin. «Il process che ha manà a quest pass n'è betg stà simpel», raquinta el.
Betg pli claustra isolada
Frater Laurentius Sauterel è in um giuven sco tschients e millis auters. Dapi sia empermischun, e sco commember dal convent da Mustér, sa differenziescha el dentant dad els: El porta l'habit nair che tradescha sia vocaziun da muntg benedictin. «La claustra da Mustér è», conferma frater Laurentius, «fitg averta e viva». Dapi ch'el è entrà en quella cuminanza, constatescha el di per di quai. La claustra è in edifizi da meditaziun e da contemplaziun, dentant betg ina cella solitaria. L'ovra da s. Sigisbert e s. Placi è sa sviluppada ad ina chasa d'albiert, in hotel che porscha alloschi, clausura e cultura. Tras il gimnasi è la claustra colliada cun il mund profan e cun la giuventetgna. Per ella ha il giuven conventual surpiglià responsabladad. Frater Laurentius è surtut activ en la lavur da giuventetgna. Urar cun giuvnas e giuvens, studegiar la Bibla en gruppa ed organisar ciclus e referats cun persunas cumpetentas èn intginas da sias incumbensas.
Actualmain è frater Laurentius dentant betg preschent di per di a Mustér. El è en il segund onn dal studi da teologia a l'Universitad da Friburg. L'onn 2024 ha el finì il studi da medischina cun in master en neurobiologia. Sia finamira è da finir en trais onns il studi da teologia e d'instruir silsuenter al gimnasi. Uschia è el sa cunvegnì cun l'avat Vigeli Monn. Ina dumonda ch'el sto respunder savens è, daco ch'el è insumma entrà en la claustra da Mustér. I n'è betg evidentamain il lieu ch'è datiers dad Yverdon, il martgà en il chantun Vad nua ch'el è creschì si. Igl è ina istorgia per sasez (mira scaffa).
Da Laurent a Laurentius
El haja gì il cletg da crescher si en ina famiglia nua ch'ins haja mai mess en concurrenza la cardientscha e la scienza. «I n'ha mai dà tensiuns pervia dal cuntrast tranter l'evoluziun biologica ed il cudesch Genesis», punctuescha il conventual. Igl è la part da la Bibla che raquinta co Dieu ha stgaffì il mund en sis dis tenor sia sumeglia. Igl è in princip da la cardientscha cristiana. «Gia ils emprims cristians savevan che quai saja dad interpretar sco simbolic e ch'ins stoppia chapir quai da maniera allegorica», explitgescha il giuven frater Laurentius. Ils emprims docturs da la Baselgia e pli tard auters, hajan confirmà quai, agiunta il doctur da la medischina e student da la teologia.
Cun entrar en claustra avess Laurent Sauterel pudì eleger in num nov per sia vita nova ch'el offrescha a Cristus. Il num da battaisem ha el adattà e simplamain surpiglià la versiun latina. «La vita da sogn Luregn è documentada bain, igl è in dals emprims martirs da la Baselgia», motivescha il frater. Durant sia furmaziun e ses svilup ha el retschavì ina predilecziun speziala per ils emprims docturs da la Baselgia. El numna dus: Ireneus da Lyon ed Ignatius d'Antiochia. I dat anc auters, Ambrosius, Augustinus, Hieronymus. Quellas persunalitads han gidà da furmar ils pilasters da la Baselgia, igl èn uschenumnads dogmatichers.
Savens en discurs cun la glieud
«A Mustér purschein nus ina nova retscha da referats en connex cun ils docturs», di frater Laurentius. Quest onn vegn el a beneventar diversas referentas e referents, per exempel ils teologs tudestgs Marianne Schlosser e Ludger Schwienhorst-Schönenberger. Il proxim che referescha è il teolog svizzer Gregor Emmenegger. Lez vegn era a discurrer dal cristianissem tempriv e dals dogmatichers.
Ins è expost. L'emprim hai jau stuì m'endisar vidlonder.
Frater Laurentius raquinta plain entusiassem da quella epoca che la cardientscha cristiana sa derasa ils emprims tschientaners. Dapi ch'el è entrà en claustra porta el cun luschezza ses habit nair dals benedictins. Cun quel s'identifitgescha el e tradischa a la publicitad sia «professiun». Sut l'habit è frar Luregn dal reminent vestgì cun chautschas da trener e t-shirt. La dumonda, sch'i dettia mainsvart discurs en il traffic public sch'el saja da viadi, rispunda el: «Bain, quai datti savens. Ins è expost, l'emprim hai jau stuì m'endisar vidlonder. Ussa hai jau savens discurs cun glieud che vul discurrer. Las sentupadas positivas domineschan claramain.»
Ina dumonda resta anc al conventual derivond da la Svizra franzosa. Quella respunda el decididamain: «Gea, clar ch'jau vi discurrer rumantsch. Jau hai ina pluna enconuschents che discurran rumantsch. Cun els vi jau ina giada savair discurrer currentamain rumantsch», punctuescha el. En ses studi da teologia sto el dentant l'emprim dar paisa a l'ebraic e grec. Ch'el dumogna era il rumantsch n'è betg da dubitar.