Siglir tar il cuntegn

Header

cuntegn

Surselva Club da bigliard 07 Rabius ha 10 onns

L’idea da fundar in club ha Willy Decurtins da Rabius gì. El ha pudì realisar quella cura ch’el è turnà da Cuira e cura ch’els han chattà in local.

A l’entschatta hajan els stuì endrizzar il local ed era cumprar las duas maisas ed ils fists, ils uschè numnads queues. 2007 eran els forsa trais fin quatter persunas che savevan gia dar in pau bigliard, raquinta Willy Decurtins. Cun mirar giu dals auters, cun ir a Cuira a dar turniers e cun leger cudeschs hajan els emprendì quest gieu ed uss sajan els ils megliers da la Surselva.

audio
Bunura: Rabius ha il sulet club da bigliard en Surselva
ord Actualitad dals 17.11.2017.
laschar ir. Durada: 2 minutas 49 Secundas.

In sport da gronda concentraziun

Mo dar bigliard saja plitost in sport, di il president dal club da bigliard 07 Rabius. I dovria gronda concentraziun ed ins stoppia exercitar permanentamain, sch’ins vegliar mantegnair in tschert nivel.

Els exerciteschian duas giadas ad emna, mintgamai il mardi e la gievgia da l’october fin Pasca. Sper ils turniers interns prendan els er part mintgatant al campiunadi grischun. Ed ils commembers dal club han er gia dà turniers en Germania.

Animar persunas giuvnas

Ina finamira fiss dad intimar dapli persunas giuvnas da vegnir en il club. Perquai fetschian els il schaner che vegn ina scolaziun cun scolaras e scolars. Els sajan 13 activs e 22 passivs e l'unic club en Surselva. President è Willy Decurtins, cassiera è Patricia Maissen ed assessur Giusep Janka.

Trics dal profi sco regal da giubileum

A chaschun dal giubileum da 10 onns ha il club da bigliard 07 Rabius pudì engaschar in profi. Ralph Eckert, campiun mundial ed autur da plirs cudeschs sur da bigliard, vegn a Rabius e demonstrescha ses trics ils 2 da december da las 20.00 ed ils 3 da december da las 11.00

RR actualitad 08:00

Artitgels legids il pli savens