Ensemen cun Thomas Hasler èn medemamain la vicepresidenta e la maina fatschenta sa retratgas. Ellas inditgeschan motivs privats per lur sa retratga. Tenor las retschertgas da RTR han las demissiuns era da far cun la situaziun mumentana da la stizun dal Volg d'Andiast e Vuorz.
L’istorgia cumenza cun l’idea da l'associaziun dal Volg Andiast Vuorz, da far in scriver per tut ils perchasas da questas duas vischnancas, per far attent sin la situaziun finanziala in pau precara. L’associaziun ha giavischà che las vischnancas faschessan attent la glieud sin quella miseria, e perquai duai in fegl sgulond vegnir repartì da las vischnancas.
Questiunari betg coordinà
La vischnanca da sia vart ha surpiglià per part il scriver che l’associaziun ha preparà. Mo la vischnanca ha cumplettà quai scriver cun in questiunari senza infurmar e discurrer cun l’associaziun. Quai n’è betg sta d’engrà a la associaziun. Las dumondas sin il questiunari sagian dumondas sur da la fatschenta sco tala. Per exempel, tge sortiment che il Volg stuessi avair u co las uras d’avertura duain esser. La pli sensibla dumonda en il questiunari è probabel stada quella davart la cumpetenza ed amicabladad da las vendidras.
Quai questiunari ha procurà per disturbis tranter las vischnancas e la suprastanza da l’associaziun. En curt vegni a dar ina radunanza extraordinaria da l’associaziun Volg Andiast Vuorz. Sco quai che Sandra Dietrich, la vicepresidenta ha ditg, hajan els gia chatta persunas che sagian prontas da trair vinavant il charr.