Tge mesiras dovri per franar ch'ils cocs dals vitgs sa svidan e las chasas vegnan vendidas sco segundas abitaziuns? Quai han duas presidentas communalas e dus umens dal svilup regiunal e dal territori discutà.
Las opiniuns van lunsch dapart
Cunzunt il sviluppader regiunal da la Surselva Ruedi Büchi ed il planisader per il svilup dal territori Orlando Menghini dal biro «Staufer und Studach» da Cuira han fatg propostas co ins savess impedir ch'ils vitgs en las regiuns sa svidan. Orlando Menghini è dal opiniun che quotas per emprimas e segundas abitaziuns gidassan da sminuir il squitsch actual sin chasas veglias. A la politica fa Menghini la reproscha che quella na veglia gnanc reducir il dumber da segundas abitaziuns e mettia a disposiziun a la fiera da segundas abitaziuns tut quai ch'è pussaivel. Uschia creschian era ils custs per il terren da bajegiar per ils indigens. Quels sa sappian bleras giadas betg finanziar novas chasas
Per Ruedi Büchi èsi impurtant che las regiuns realiseschan ch'ellas en dependentas da lur vitgs perifers. Tenor el na tanschi betg sche mo ils centers regiunals investeschan. Infrastructura da basa stoppia esser cuntanschibla per tuts aifer 15 minutas.
Soluziuns realisticas
Las duas presidentas communalas Carmelia Maissen da Glion e Nora Saraz da Puntraschigna èn sa dustadas envers soluziuns da quotas. Quellas na sajan el mument betg realisticas. I dovria mesiras accumpagnantas che la populaziun accepta. Ellas han fatg attent sin la situaziun che ils possessurs d’immobiglias vendian ussa d'ina vart lur chasas per summas exageradas, da l'autra vart stoppian las vischnancas organisar terren prest gratuit da bajegiar per indigens e quai savens cun daners publics. Cun il svilup actual en la societad saja strusch pussaivel da schliar ils problems actuals.
Las vischnancas ston agir
Tant Orlando Menghini sco era Ruedi Büchi han fatg attent che las vischnancas ston agir sez. Enfin che la politica a Berna vegnia cun soluziuns saja memia tard. Sin basa da la lescha vertenta datti per ils participants e las participantas a la discussiun al podi avunda spazi d'agir.
Or da l'archiv:
