Il coiffeur da Sedrun Otto Curschellas maina dapi 37 onns ses salun da coiffeur. El ha sco tut ils coiffeurs en Svizra puspè pudì avrir ses affar glindesdi dals 27 d’avrigl. Per pudair far quai sto el dentant sco tut tschels ademplir tschertas prescripziuns. Ina da quellas èn mascras da protecziun ch’el sez ha da purtar, sco era la clienta u il client.
Per far la segira
Dapi blers onns è Otto Cuschellas gia commember da l’associaziun dals coiffeurs svizzers. Quels han infurmà nua ch’ins po empustar mascras ed auter material da protecziun. Quai ha Otto Curschellas era fatg. E per far la segira ha el anc vulì empustar ina tscherta reserva.
Sis pachets cun bleras mascras
La gievgia dals 23 d’avrigl ha il coiffeur pia fatg sia empustaziun da 100 supplementaras mascras da protecziun. Il pretsch per quellas muntava a 65 raps quai che pareva favuraivel. Uschia fiss stà da pajar 65 francs. Ma cura che Otto Curschellas ha mirà sin il quint alura ha el vis ch’el aveva empustà enstagl da sulet 100 mascras, 100 pacs a 50 mascras, pia 5’000 mascras da protecziun.
Entaifer paucs dis vendì dapli che 3’000 mascras
Ma en il temp dal coronavirus èn mascras da protecziun tschertgadas. Uschia ha el sulet gì da far paucs telefons. En famiglia ha el pudì vender passa 1’000 mascras. Ses collega coiffeur ha prendì 500 mascras e la vischnanca da Tujetsch la finala 800 mascras. Uschia ha el vendì entaifer curt temp passa 3’000 mascras da protecziun. Ma el n’ha betg vulì far fatschenta cun quai perquai ha el vendì ellas per il pretsch da cumpra da 65 raps il toc. Ma cun in surrir di il coiffeur, ch’el saja vegnì en in temp cura che tuts tschertgan talas mascras da protecziun entaifer paucs dis gist tar 5’000 da quellas. Quai saja lura stà la gronda surpraisa per el, di Otto Curschellas. Sche quai resta alura mascras po el trametter enavos ellas, ni salvar ellas.