Coiffeura Silvana Di Fini - «Finalmain puspè lavurar»

Dapi ils 16 da mars èn bleras fatschentas serradas, uschia era il salun da coiffeur da Silvana Di Fini a Laax. Ella sa regorda anc bain vid il di, cura ch’ella ha udì, ch’ella stoppia serrar il salun.

Lura èsi stà dad annullar tut ils termins ch’ella avess gì e serrar il salun. Pir il favrer aveva ella avert il nov salun. Avant era ella en il medem edifizi, gia dapi 20 onns, ma en in auter lieu. Uss, strusch ch’ella ha gì avert il nov salun, ha ella puspè stuì serrar. Ma era sche quai ha fatg mal, vesa la coiffeusa da 52 onns il positiv. Ella è oriunda da l’Italia ed è vegnida il 1977 en Svizra. Blers confamigliars vivan anc en l’Italia e sco ella di, sajan quels en ina bler mendra situaziun. En Svizra vegnian ins tenor Silvana Di Fini sustegnì fitg bain, surtut en cumparegliaziun cun ils vischins dal sid.

Avrir il salun cun bleras restricziuns

Glindesdi po la coiffeusa puspè avrir il salun. Quai dentant cun sa tegnair vid diversas regulaziuns. Uschia dastga mintgamai mo ina clienta u in client esser en il salun. Quel sco era ella ston purtar ina mascra che cuvra bucca e nas. Plinavant ston ins duvrar sientamauns da palpiri e scussals sintetics che vegnan dismess suenter duvrar ina giada.

Cura che la frisura è finida e la clienta u il client è sortì, ston lura la sutga ed ils utensils duvrads vegnir dischinfectads. Quai munta blera lavur, uschia che Silvana Di Fini quinta da pudair beneventar mintgadi mo la mesadad da la clientella che usità.