Las duas vischnancas da Trun e Sumvitg n’han omaduas quasi nagina infrastructura turistica e cunfineschan cun regiuns pli grondas turisticas. Las uniuns turisticas da las vischnancas n'han perquai er betg gronds budgets ed han omaduas il medem contract da prestaziun cun Surselva turissem, l’uniun da Sumvitg Turissem dapi l’entschatta da l'onn.
Sco il president da Sumvitg Turissem Andy Monn ha ditg na saja quai betg pussaivel da far gronds projects, ma tuttina hajan els vulì cuntanscher cun pauc uschè bleras persunas sco pussaivel.
Film realisà da dus cineasts indigens
Las uniuns hajan dà ideas ma la finala hajan ils dus cineasts giuvens da DHD media realisà il film, ha ditg il president da Trun Turissem Daniel Tuor. Uschia cumenzà il film sin la planira da la Greina en la chamona dal Terri. Alura suondan inscunters cun velo e sin la plazza dal campadi a Trun. Per alura visitar las purschidas culturalas ed architectonicas.
Els sajan fitg cuntents cun il film ed emprovian er da promover el sin ils chanals socials e sin youtube, di Daniel Tuor. E cun quai che la collavuraziun saja buna vegnian forsa era proxims projects a suandar, sco per exempel in film da promoziun d’enviern. Ma quai stoppian els anc decider, ha ditg Daniel Tuor.