La fin dals onns 70 han scienziadas e scienziads da las linguas rumantschas instradà il prim inscunter internaziunal. Surtut il barat duai star en il center, savens sajan ins en il biro sulet cun ses tema ed uss hajan ins la chaschun da sa barattar e profitar era da dumondas criticas, uschia Rico Valär, professur da rumantsch a l’Universitad da Turitg. Quai saja impurtant per il svilup da la lingua, pertge il diever da la lingua dependia era da nua che quella vegn duvrada. Sche la lingua vegn scritta en la litteratura e duvrada a moda linguistica haja quai ina plivalur per tut las pledadras ed ils pledaders da la lingua minoritara u betg minoritara, uschia Valär.
Radund 40 romanistas e romanists
Da la partida quest onn èn rodund 40 romanistas e romanists che refereschan da fitg differents temas da la lingua. Questa diversitad saja la fermezza, uschia Valär. Tenor turnus han quels inscunters lieu mintga trais onns en ina autra regiun, questa otgavla ediziun è la terza en il Grischun.