Sin ina surfatscha da 1'600 m2, quai è bunamain la surfatscha d'ina plazza da glatsch, venda la Landi tut quai ch'i dovra per il mintgadi ed anc dapli. Ella è mo ina da pliras novas grondas stizuns da commerzi en detagl, che vegnan bajegiadas ni ch'èn planisadas a Glion e conturn. Landi, Coop, Migros, Aldi, Lidl, Denner, Spar ed anc autras fatschentas vesan Glion sco center regiunal ed investeschan en novs negozis.
Nagin problem per ils negozis a Vella, Cumbel e Morissen
Savens munta l’avertura da tals centers da cumpra problems per negozis en vitgs da la periferia. Quai na vala dentant betg per ils 3 Volgs a Vella, Cumbel e Morissen. Tenor il president da la societad cooperativa ViVal Lumnezia che maina quels 3 negozis, Daniel Blumenthal, vegn l’avertura da la nova Landi a Schluein betg ad avair ina gronda influenza sin il dumber da clients. Els hajan cunzunt persunas pli passadas ed osps da vacanzas che cumprian en tar els. Quellas persunas giaudian da na betg stuair prender igl auto ed ir a Glion per far las cumissiuns.
Concurrenza locala fiss in problem
Pli gronds problems avessan ils 3 negozis a Vella, Cumbel e Morissen, sch’in auter negozi avriss las portas en il medem vitg. Sche quai schabegiass, na sa Daniel Blumenthal betg, sch’i reussiss a la societad cooperativa ViVal Lumnezia da mantegnair ils 3 negozis. El quinta dentant betg, che quai saja il cas ils proxims onns.
