Armin Spescha, avant dus onns avais Vus vendì vossa fatschenta communicaziun.ch a la Somedia, essas dentant anc restads mainafatschenta. Pertge chalais Vus ussa suenter prest dus decennis?
Quai è adina stà ina part da mes plan. Cura ch’jau hai fundà l'interpresa hai jau schon ditg: tranter 50 e 55 vuless jau savair tgi che fa mia fatschenta. Perquai n'èsi era betg stà uschè ina gronda surpraisa per quels ch'èn datiers a mai che quella vendita è vegnida lura. Jau n'hai dentant betg tschertgà la vendita, tras quai è ella vegnida plitost baud. Ma tuttina avain nus lura ditg che quai sto esser ina part da mes plan che jau vegn ad uras da surdar la fatschenta. Perquai che jau sun persvadì ch’in bun um da fatschenta èn ins pir sch’ins è abel da surdar ina fatschenta ad in proxim construct.
E pertge gist ussa? Èsi simplamain il mument per dir: «Ussa èsi bun»?
Gea, quai è era stà part dal plan en mes contract da vendita. Duas parts: ina è ch’jau vend e stun anc tranter 5 fin 7 onns sco mainafatschenta. Ed ina è ch’jau guard sez per mia successiun persunala ed en quest plan eran nus sin via, bain che la successiun persunala è era reglada.
Jau sun in strateg – lura hai sco dà ina via ch’era fixada cun quels terms ch’jau vom uss ora la stad. E perquai è quai en sasez vairamain ina part dal plan e betg insatge che capita simplamain.
Vus avais gia ils davos mais tschertgà ina schliaziun interna. Quai na para betg d’avair funcziunà, ed ussa è scrit ora che Vus tschertgais ina persuna externa. Pertge n’èsi betg stà pussaivel da chattar insatgi intern per il post da mainafatschenta?
Noss giavisch era dad avair ina successiun interna. Nus avain adina savì che quai po era esser grev. Jau crai che la pli gronda sfida che nus avain uss u che nus vesain ch’è uss era da surdar quella fatschenta ch’è betg pitschna. Nus avain trais filialas, nus avain 80 collavuraturs, nus faschain passa 10 milliuns svieuta. Quai è ina gronda fatschenta. E surdar quella or dal construct da famiglia, dal fundatur, ch’è stà qua di e notg è crai jau la gronda sfida che nus avain gì.
La situaziun ha mussà che la successiun interna preparada n’ha betg funcziunà sco giavischà. Tuttina hai dà ina nova schanza: ils successurs restan en la fatschenta, dentant la direcziun surpiglia ussa la giunta, e parallelamain vegn tschertgà in nov successur.
Vus dais uss giu batgetta sco mainafatschenta e restais dentant en il cussegl d’administraziun e vegnis era vinavant a surprender mandats sin incumbensa da communicaziun.ch, surtut per la marca Grischun. Na savais pia betg laschar liber dal tuttafatg?
Era sch’ins di magari ch’igl è mes «pop», jau ves quai tuttina sco in object economic. Quai è surtut ina chaussa da testa. Jau hai adina savì: jau na dun betg giu e rest suenter sco cussegliader u maina projects – quai na dat betg. Jau na stoss cussegliar nagin, els san tge far.
Nus avain dentant ditg che jau nizzegia anc mes temp curt per sustegnair els, per exempel cun la marca Grischun. Quai hai jau savì far, perquai che jau na sun betg pli mainafatschenta. Uschia na ston ins era betg temair che jau na poss betg laschar ir.
Jau bandun er la chasa: la fin zercladur mid jau en in agen biro. Uschia na sun jau betg pli en il mintgadi da l’interpresa.
Co vai lura vinavant cun Armin Spescha, sper la marca Grischun ed ils singuls mandats per communicaziun.ch?
Jau sun econom ed interprendider da cor, e perquai hai jau era gia fundà ina nova fatschenta: 4tact. Quai è ina fatschenta cun quatter novas purschidas che na concurrenzeschan betg cun quai ch’i dat oz.
Cun 4tact vi jau construir ina pitschna existenza per mes davos onns da lavur. Jau na vi dentant betg ch’ella creschia fitg – quai duai restar mia fatschenta.
Jau na vi era betg pli in agen team, perquai che la pli gronda valur che jau lasch enavos è il team dad oz. Sche jau dovr dentant persunas, lura turn jau enavos tar communicaziun.ch.
Il patratg principal è dentant ch’jau lavur il pli pussaivel sulet.