En l’Ucraina è guerra ed er Simon Camartin na sa betg diriger l'orchester. Uschia fa Volodymyr Syvokhip quai. El è directur general e dirigent da l’Orchester filarmonic naziunal da L'viv. Quest onn na fa el betg mo musica, ils musicists e las musicistas èn cun lur turnea era sin ina missiun d’impurtanza naziunala.
Nossas turneas en l’exteriur èn fitg impurtantas per nus da restar colliads e per savair dir grazia a noss public.
L'Orchester filarmonic naziunal da L’viv vul far attents la glieud en autras tiaras davart lur situaziun. L'onn da guerra ha gì in’influenza sin il program. Sche l'orchester da renum sunava en il passà musica pli festiva per lur concerts da Bumaun, alura ha quai midà. Ils musicists e las musicistas sunan musica che ha in connex cun temas sco guerra, libertad u pasch. Tranter auter sunan els la cumposiziun sinfonica «Finlandia» da Jean Sebelius ch’è in protest sonor encunter la repressiun russa envers la Finlanda da lez temp.
In dals puncts culminants è il concert per clavazin numer dus da Felix Mendelssohn cun la pianista Andrea Wiesli. Ella ha gia sunà cun l'orchester da L’viv avant l'onn passà ed ha remartgà che la situaziun actuala sa fetschia remartgar durant il far musica. I saja pli emoziunal.
Igl è insatge ch’ins po communitgar senza pleds, sch’ins po far musica ensemen. Insatge che collia.
Il program ha er duas cumposiziuns da cumponists ucranais: Il «Capriccio per Gion Balzer» da Victoria Poleva che sa basa sin «La saira sper il lai» e las «Set chanzuns popularas polonaisas» da Czeslaw Marek. Las atgnas ragischs sajan daventadas pli impurtantas durant la guerra, entant che la musica da cumponists russ na vegnia en il mument betg sunada. L’Ucraina haja mo in futur, di Volodymyr Syvokhip, mo sco quel vesia ora na sa nagin en il mument.
L'Orchester filarmonic naziunal da L'viv suna ils 29-12-22 da las 20:00 en «La Fermata» a Falera.
Or da l'archiv:
