Concurrenza da siglir cun chaval a Glion è impurtanta

L’Uniun da cavalcar Trun e contuorn organisescha per la 13. giada la concurrenza da siglir cun chaval. Ina concurrenza regiunala ch’è impurtanta.

Manuela Henny cun ses chaval Toledo a la concurrenza da siglir cun chaval a Glion. Bild in Lightbox öffnen.

Legenda da maletgs: Manuela Henny cun ses chaval Toledo a la concurrenza da siglir cun chaval a Glion. mad

Perquai ch’i na dat betg bleras concurrenzas da chavaltgar en la regiun è la concurrenza regiunala a Glion impurtanta, declera la presidenta dal comité d’organisaziun Anastasia Wolf. Ils chavaltgaders guardian da na betg stuair far memia lungs viadis cun lur chavals. Vegnir vegn la gronda part dals var 80 chavaltgaders lura era dal Grischun, dentant era dal Tessin, dal Glaruna u era dal S. Gagl.

Anastasia Wolf Avrir maletg en lightbox.

Legenda da maletgs: Anastasia Wolf, presidenta dal comité d'organisaziun RTR, G. Hosang

Concurrenza per mintgin

Quest onn datti da nov era ina concurrenza per persunas che n’han betg il brevet ubain la licenza da sa participar a las concurrenzas nua ch’i va per puncts en la rangaziun naziunala. Pia per tut quels e quellas che chavaltgeschan sulet per plaschair. Sco Anastasia Wolf di, saja quai in percurs nua ch’il chavaltgader possia mussar sin differents posts ses inschign.

Speran sin blers aspectaturs

La concurrenza custa tranter 20’000 e 25’000 francs. Daners ch’i dovra oravant tut per indemnisar la giuria, il construider da percurs, ils spezialists che mesiran il temp e la finala era per ils premis. Cuverts vegnan ils custs entras sponsurs, il daners da partenza dals chavaltgaders e sa chapescha era entras las entradas da la gastronomia. Uschia spera Anastasia Wolf sin bleras aspectaturas ed aspectaturs che visitan la concurrenza cun sias attracziuns per pitschen e grond.