La scola furma ina da las pitgas per la lingua rumantscha en las vischnancas rumantschas, quai dasper la famiglia, declera il president da la «Conferenza generala Surselva» Francestg Friberg. El è mainascola a Danis-Tavanasa ed el conferma che las scolas rumantschas sajan obligadas d’instruir rumantsch, ma era da communitgar per rumantsch. Uschia possian ils geniturs contactar el ed el decleria alura tut, er en autras linguas, ma communicaziuns sco era discurs da geniturs, quels vegnian fatgs per rumantsch, declera Francestg Friberg ch’ha presidià al conferenza da scolasts ils ultims 9 onns.
A la periferia linguistica in'autra situaziun
Auter vesa quai ora als cunfins linguistics. A Laax per exempel ès d'infurmar quasi era per tudestg, uschia Adrian Cathomas, scolast al stgalim superiur da la scola. Las sairas da geniturs vegnian perquai fatgas per regla per tudestg, era per che tuts possian suandar a las explicaziuns. Ins possia far folias rumantschas u il cuntrari, ma ins stoppia era restar realistic, tenor Adrian Cathomas ch’ha surpiglia il presidi da Francestg Friberg ch’ha abditgà. La lingua saja sut squitsch, quai saja la realitad, ma sch’ins guardia sin la stedia participaziun dals scolasts e las scolastas rumantschas a la Conferenza Surselva, alura saja el era optimistic per il futur.
Impurtant d’avair meds d’instrucziun
In punct che la conferenza da scolasts ha persequità tut ils onns è da crear meds d’instrucziun era per rumantsch. Il chantun saja obligà da far quai per tut ils roms. Qua vegnian els sco uniun da la magistraglia ad insister vinavant tar il chantun, fin ch’ils meds d’instrucziun sajan tuts sin maisa, uschia Francestg Friberg. Ma che la realitad linguistica è sa midada en Surselva è ina realitad e cun quella stoppian els viver.
Nov president e nova suprastanta
Chattar ina successiun per Francestg Friberg na saja betg stà simpel. Uschia n’hajan els ditg betg chattà ina persuna. La finala saja Adrian Cathomas, che fascheva part da la suprastanza, stà a disposiziun per il presidi. Perquai ha la radunanza generala elegì Gianina Spescha sco suprastanta. La suprastanza vegn cumplettada da Riccarda Caderas sco actuara, Catarina Steger sco cassiera ed Evelina Giger sco assessura.