Er la radunanza communala da Falera ha ditg Gea al consorzi da scola communabel cun Laax, Sagogn e Schluein. Votantas e votants han approvà il project unanimamain.
En l’avegnir duai in cussegl da scola manar il consorzi per tut las quatter vischnancas. Quai cun la finamira da mantegnair la qualitad da la scola per ils uffants sco per la magistraglia. Midadas dal lieu da scola dessi be per ils uffants da Sagogn e Schluein.
Gia dà glisch verda per il consorzi da scola ha la vischnanca da Sagogn e da Laax. Per che tut possia ir en vigur tenor plan l’avust 2022 dovri anc il consentiment dals vischins da Schluein. Quels decidan mesemna.
Sagogn ha gia detg Gea
La radunanza communala da Sagogn vul engrondir il consorzi da scola cun las vischnancas vischinas. Surtut las annadas pli flaivlas che suondan ils proxims onns a Sagogn han dà il stausch decisiv da far quest pass, uschia il president communal Thomas Candrian. Uschia saja Sagogn il mument plitost en ina val, quai che pertutga naschientschas e tar ils vischins a Schluein saja quai il mument gist il cuntrari. Cun engrondir il consorzi da scola era sin la primara, saja l’emprim ciclus da scola, che va davent da la scolina fin la secunda classa, en il vitg sez e saja garantì era sch’il dumber da scolaras e scolaras avess da crudar sut la limita minimala dal chantun (7 scolaras e scolars), uschia ils dus incumbensads Martin Mathiuet e Josef Willi, sin la suletta dumonda ord il plenum.
Vegnir pli attractiv per tuts
La finamira principala saja da pudair mantegnair la qualitad da la scola e quai per las scolaras ed ils scolars, ma era per ils scolasts. Uschia saja l’idea da far classas singulas, a partir da la terza classa, dal segund ciclus da scola, e quai fetschia senn per il svilup da las scolaras ed ils scolars. Uschia possia vegnir resguardà meglier il basegn da tuts, uschia ils arguments da las duas persunas incumbensadas. Ma era per las scolastas ed ils scolasts saja quai ina buna schliaziun, perquai che en in consorzi da scola pli grond possian ins tut tenor era far midadas internas e quai saja tar in pitschen strusch pussaivel.
In cussegl da scola per tut las quatter vischnancas
En l’avegnir duai il consorzi vegnir manà d’in cussegl da scola nua che la suprastanta responsabla per l’educaziun da mintga vischnanca fa part. Ma quest cussegl duai era vegnir engrondì cun persunas betg da la vischnanca ma cun ina scolaziun el sectur d’educaziun. Uschia possian ins vegnir pli professiunal ed il cussegl da scola possia era sa concentrar sin la strategia dal consorzi da scola. Sumegliant duai era la direcziun dal consorzi vegnir furmada.
Uschia duai dar in manader da scola per la scolas primaras da Schluein e Sagogn, in per las scolas primaras da Falera e Laax ed in per il stgalim superiur. Sur quels trais duai star ina persuna ch’ha la cumpletta direcziun dal consorzi. Quai possia esser ina persuna externa, u era ina persuna che maina gia ina scola dal consorzi. Uschia possia tut vegnir professiunalisà. Era duai dar in secretariat per l’entir consorzi che vegn da far las lavurs administrativas, uschia ch’il mainascola po sa concentrar sin la lavur da sustegnair las scolastas ed ils scolasts, sco era sin il contact cun ils geniturs.
Tuttas vischnancas ston sustegnair il project
Sco ultima vischnanca decida lura ils 15 da december Schluein. Sche tuttas vischnancas sustegnan l’engrondiment dal consorzi da scola, entra la midada en vigur sin l’onn da scola proxim, quai vul dir sin l’emprim d’avust 2022.
