Construcziun bassa - Sfidas tar la construcziun da la via d’Alpsu

Curt suenter Dieni en direcziun dal pass Alpsu vegn la storta da Sumsassi. A partir da qua vegn la via pli stretga e dus autos da persunas vegnan strusch pli da sa cruschar. Era la viafier Matterhorn-Gottard ha gist sper la via, paucs meters sura, ses binaris. La spunda giu en la val è taissa. Sin quel tschancun vegnan fatgas las lavurs da construcziun e las circumstanzas portan pliras sfidas. Ils onns passads hai perquai era dà ponderaziuns per in tunnel da la viafier en quest lieu. Ma la finala n’èn tut quels plans betg vegnids realisads, di Damian Marino, manader da construcziun tar l’Uffizi da construcziun bassa.

Far punts persas per schlargiar la via

Il plan actual prevesa da realisar pliras punts persas sin il tschancun per uschia schlargiar la via principala. Quai ha per consequenza ch’i dovra betunadas pli grondas. Per pudair realisar quai effectivamain ha l’interpresa responsabla dumandà il chantun per pudair serrar parzialmain la via la notg. La raschun principala è da pudair lavurar effizient nà da la via cun maschinas ed uschia accelerar las lavurs, di il manader da construcziun da l’interpresa incaricada François Borner. Quai saja era ina da las premissas ch’il chantun fa tar la surdada da las lavurs, ch’il traffic na dastga betg vegnir impedì durant il di, per la notg dovra quai alura ina lubientscha. In'autra raschun saja la qualitad dal betun, quella saja meglra sche las temperaturas na sajan betg uschè autas, di Borner. Perquai sajan els era leds ch’il chantun ha dà la suatientscha da far las lavurs la notg a l’interpresa.

Suenter las lavurs vi da la via suonda il trassé da viafier

Las lavurs vi da la via han cumenzà il 2021. En tut investescha il chantun en questa sanaziun 11 milliuns francs sur tut quels onns. L’emprim ha il grip stuì vegnir allontanà. Cunquai che quel cuntegneva asbest ha tut il material stuì vegnir deponì en in lieu spezial documentà di Damian Marino. Perquai saja quella lavur lev s’entardada. In auter punct ch’ha entardà las lavurs è in recurs a la Dretgira administrativa en connex cun la surdada da las lavurs. Quel saja era giud maisa uss ed il 2023 hajan ins perquai per propi pudì cumenzar cun las lavurs, di Tobias Walschburger, responsabel per quest tschancun tar l’Uffizi da construcziun bassa.

Suenter che las lavurs vi da la via èn finidas, tenor plan fin il 2025, suondan las lavurs vi dal trassé da la viafier. Quellas vegnan alura fatgas da la viafier Matterhorn Gottard, di Walschburger. Els sajan optimistics che las mesiras uss fatgas bastan era per ils proxims onns e l’augment da traffic prognostitgà, uschia Walschburger. Ma spetgar avant la chazzola cotschna stoppian las automobilistas ed ils automobilists probabel en quest lieu anc plirs onns.