Siglir tar il cuntegn
Inhalt

Surselva Controlla da buis da chatscha

Tut suenter il motto "Vertrauen ist gut, Kontrolle ist besser" vul il chantun perquai vesair mintga 10 onns tut las buis ch'ils chatschadurs dovran per ir a chatscha. Quest onn èsi puspè uschè lunsch. En l'entir Grischun ston ils chatschadurs mussar lur armas als guardiachatscha.

Daniel Bundi tegn ina buis da chatscha enta maun e legia la cifra da la buis. Werner Degonda sesa davos ina maisa e noda la cifra en in laptop.
Legenda: Daniel Bundi (dretg) controllescha ina buis da chatscha auta, Werner Degonda (sanester) noda tut en il computer. RTR, C. Albin

Per chatschaders è lur buis l'instrument il pli impurtant. Senza buis nagina preda. Ina buis è dentant ina arma fitg privlusa che sto funcziunar 100%. Cun questa controlla da las armas vul il chantun procurar per dapli segirtad. Controlladas vegnan tant buis da chatscha auta sco era buis da chatscha bassa. Cunzunt 3 puncts vegnan controllads: il caliber, l’arretaziun e che la channa n'haja betg donns. Buis manglusas sto il chatschader laschar reparar e puspè mussar ad in guardiachatscha.

Conferma nudada en il cudesch da patenta

Mintga buis controllada vegn nudada separà en il cudesch da patenta. Il chatschader dastga mo ir a chatscha cun ina da las buis nudadas en il cudesch da patenta. Sch'ina buis vegn duvrada da plirs chatschaders, sto ella vegnir nudada en tut ils cudeschs da patenta dals chatschaders pertutgads.

Controlla dispitaivla

Per intgins chatschaders n'è la controlla betg giustifitgada. Ils 20 francs che la controlla custia saja memia bler e la finala saja mintga chatschader sez responsabel per ses schluppet. Cun questas controllas veglia il chantun sulettamain gudagnar daners.