Siglir tar il cuntegn

Header

Navigaziun

L'autura e ses cudesch
Legenda: L'autura e ses cudesch RTR, H. Giger
cuntegn

Surselva Cornelia Vinzens: «Sentir tge ch'è impurtant»

«Nus savevan da nuot auter – Etwas anderes kannten wir nicht» uschia sa numna il cudesch da Cornelia Vinzens da Ruschein. I sa tracta da purtrets da la generaziun pli passada en Surselva.

L’idea da scriver quest cudesch saja vegnida durant il temp da far la matura a la scola media a Cuira. Ella aveva vis in cudesch nua che persunas raquintavan da la Secunda guerra mundiala e quel aveva plaschì fitg bain. Lura haja ella pensà ch’i fiss interessant da laschar raquintar ses tat e sia tatta ed autras persunas spezialmain sur da quest temp.

Mo la finala haja ella tschernì in auter tema per la lavur da matura. Tuttina n'haja ella betg emblidà il tema – surtut era perquai che ses tat e sia tatta eran en in'auta vegliadetgna – e perquai haja ella prendì in di in apparat da registrar e saja ida tar els.

Plirs discurs

Cornelia Vinzens ha dentant realisà en ils discurs cun ses protagonists che quels avevan bler da raquintar, surtut era chaussas ch’ella n'enconuscheva betg sco temas en connex cun la baselgia catolica, la scola ubain las ierarchias en ils vitgs. Perquai ha ella midà il concept e betg fixà ses cudesch mo sin il temp da la Secunda guerra mundiala.

Giacun Barclamiu e Cecilia Cory-Spescha
Legenda: Giacun Barclamiu e Cecilia Coray-Spescha RTR, H. Giger

«Starmentus co quai è sa midà»

Il resultat èn 17 purtrets dad umens e dunnas ch'han vis bler en lur vita ed han fatg bleras experientschas – ubain ditg cun ils pleds dad in um che fascheva il pur e che constatescha:
«Starmentus co quai è sa midà. La glieud è davent. Igl è vegnì bajegià da nar e las chasas veglias restan vitas. Jau na sai betg co quai duai ir vinavant cun noss vitgs.»

Cornelia Vinzens ha 31 onns ed ella lavura a Basilea sco architecta d’interiurs. Ses cudesch è cumparì tar la chasa editura Somedia en 2000 exemplars. Ins po cumprar el tar l’autura ubain en las librarias.

RR actualitad 11:00