Cumenzà aveva tut cun ils emprims cas en la scoletta. Cunquai che blers uffants da la Scola Lumnezia èn fragliuns – è il virus sa derasà dretg spert en las differentas classas. Quai haja pretendì blera lavur organisatorica per la manadra da scola Claudia Cabalzar. Il davos temp haja ella fitg savens stuì laschar da la vart sia normala lavur da mintgadi e sa fatschentar cun ils cas da corona en sia scola – e tut sias consequenzas.
Igl ha dà dis, ch'ins ha lavurà practicamain mo per corona – cun tut quellas lavurs supplementaras ch'èn vegnidas vitiers.
Era per las scolastas ed ils scolasts èn las davosas emnas stadas pretensiusas. Uschia era per Andriu Hosang – il scolast da la 6avla primara. Ubain ch'el è sez stà en isolaziun ed ha stuì instruir da chasa anor – ubain che almain in uffant è stà en isolaziun, uschia ch'el ha stuì instruir simultan – en scola sco era online. Quella lavur saja bler pli stentusa perquai ch'ins haja da far lavur dubla. Vinavant saja homeschooling betg ideal per tut ils uffants. Surtut per quels, che dovrian gia en la stanza da scola bler agid dal scolast u la scolasta – saja quai grev da lavurar uschè savens a moda independenta.
Igl è effectiv uschia, ch'ins è mintgatant brutal en il stress.
Quest'emna haja dentant dà in pau glisch a la fin dal tunnel. L'emprima giada dapi ils emprims cas en la scoletta sajan tut ils pools cun ils tests da corona stads negativs. Uschia che la manadra sa legria da puspè pudair far sia normala lavur da mintgadi. Almain per il mument.