Siglir tar il cuntegn

Header

audio
Roger Tuor e ses 100 dis en uffizi tar la Regiun Surselva
Or da Actualitad dals 29.11.2023. Maletg: RTR
laschar ir. Durada: 4 minutas.
cuntegn

Corporaziun da vischnancas «La Regiun Surselva è fitg gronda e multifara»

Dapi l'entschatta avust è Roger Tuor il nov mainagestiun da la corporaziun da vischnancas, la Regiun Surselva. El è uschia il manader operativ da la Regiun Surselva che ha numerusas incumbensas da las vischnancas, sco era dil chantun. Suenter 100 dis en uffizi è Roger Tuor amez las fatschentas.

El haja cumenzà bain, uschia il nov mainagestiun da la Regiun Surselva. Cumpareglià cun ses anteriur post sco mainascola a Mustér saja la Regiun Surselva fitg gronda cun sias partiziuns che tanschan da la furmaziun enfin il recicladi. Roger Tuor è da nov schef da rodund 130 collavuraturas e collavuraturs.

La Regiun Surselva è fitg gronda e diversa, ed igl è motivant da sa dar giu cun chaussas total novas.
Autur: Roger Tuor mainagestiun da la Regiun Surselva

La lavura saja pli politica, cunquai che la Regiun Surselva survegnia incumbensas da las vischnancas e dal chantun ed è uschia tranter quellas instituziuns. En in emprim temps saja el vid sa lavurar en e sa leger en en ils divers dossiers.

Casa Surselva
Legenda: La «Casa Surselva», il sez principal da la regiun Surselva. RTR

Ina lavur operativa ch'ha fatschentà il nov mainafatschenta dapi la bun'entschatta e che fatschenta el vinavant, pertutga la furmaziun. El ha da metter sin via la midada da las localitads da scola a Glion: Las scolas ch'èn mumentan en las immobiglias da la Claustra da Glion vegnian ad ir sin fin da l'onn 2027 a la staziun da Glion.

La planisaziun da las novas localitads da scola è cumplainamain en vigur e nus essan en contractivas cun il chantun davart la finanziaziun.
Autur: Roger Tuor mainagestiun da la Regiun Surselva

Ed era las lavurs da la Regiun Surselva augmentan. Il recicladi, la furmaziun, la curatella professiunala, il stadi civil, l'uffizi da stumadira e concurs ed il svilup regiunal: En quest mez tschientaner ch'i dat la Regiun Surselva ha ella adina survegnì dapli incumbensas da las vischnancas e dal chantun. Quai ha Roger Tuor vesì en quels bainprest quatter mais en uffizi, el haja gia suttascrit duas novas cunvegnas da prestaziun. La tendenza e plitost ch'i è da surprender dapli per il bainstar da la regiun, uschia il nova mainagestiun.

Da la vart strategica vesa Roger Tuor in svilup prosperativ per la regiun sco pli gronda sfida. «Nus stuain far attractiva la regiun», uschia il nov mainagestiun.

RTR actualitad 17:00

Artitgels legids il pli savens