Corrupziun en Val?

La vischnanca da Val son Pieder haja fatg grevs sbagls cura ch'ella haja vendì l'hotel Therme a l'investider Remo Stoffel. A questa conclusiun vegn il professer emerità per dretg public Rainer J. Schweizer. El discurra da corrupziun. Il suveran saja vegnì infurmà fauss a la radunanza dal 2012.

fatscha da Rainer J. Schweizer, um cun egliers e barbis Bild in Lightbox öffnen.

Legenda da maletgs: Il professer emerità per dretg public Rainer J. Schweizer (fotografia dal 2002) Keystone

Ord quai motiv na possi il contract da vendita gnanc esser valaivels. Schweizer ha fatg pliras expertisas per ina gruppa da votants da Val. Lezza aveva inoltrà in recurs cunter la decisiun da la radunanza communala dal 2012. Il Tribunal federal ha dentant refusà il recurs. Tenor Schweizer tutgia la vendita dal hotel Therme tar ils gronds cas da corrupziun en Svizra.

Crititga envers il chantun

En in rapport dal Tagesanzeiger crititgescha Schweizer era il chantun Grischun. Lez avessi gì d'infurmar las autoritads da Val che Stoffel saja confruntà cun autas pretensiuns da taglia. Lura avessan ils votants forsa ponderà sch'els veglian surlaschar in quart da la facultad da la vischnanca a Stoffel, uschia Schweizer. Il chantun refusa las renfatschas. Il departament da finanzas dal Grischun haja agì correct, uschia vegn scrit en il Tagesanzeiger. Il chantun na dastgia betg dar infurmaziuns sur da pajataglias, quai pervi dal secret da taglia.

RR novitads 06:00