Sco las pendicularas da Laax han confermà, ha la cabina stuì franar nunspetgadamain, suenter che la rauba pendida ha sdrimà in crest. Ord quai motiv èn plirs dals 35 passagiers a bord crudads. Ina passagiera è vegnida blessada lev vid in det.
Memia grev transport da rauba
La cabina n’è betg vegnida donnegiada cunquai che betg quella ha sdrimà il terren mabain il material pendì vid la cabina. Pertge ch'ins haja pendì vidlonder in transport da rauba memia grev, vegnia actualmain examinà. Il mument na vegnian betg pli fatgs transports da rauba durant il manaschi ordinari, scrivan las pendicularas. L'incap saja vegnì annunzià al Post svizzer per l'examinaziun d'accidents e segirtad SUST.