Sco cumpensaziun per CO2 planisescha l’interpresa turistica Arena Alva da plantar guaud sin 2220 meters sur mar. Enturn e sut il hotel sin il Crap Sogn Gion duai puspè avair plantas.
Actualmain saja il cunfin da guaud sin 1800 meters sur mar. Ins veglia dentant puspè restabilir la situaziun oriunda, avant ch’il carstgaun haja usche ditg fixà en il temp medieval il cunfin da guaud, declera l’interpresa. Che l’idea da plantar guaud sin passa 2200 meters sur mar saja da princip ina buna chaussa e che quai guaud avess er in effect positiv sin la bilantscha da CO2 ha il manader da l'Uffizi chantunal da guaud e privels da la natira Urban Maissen, confermà sin dumonda da la FMR. Il chantun saja en contact cun l’Arena Alva. Cura e tge plantas che duajan vegnir plantadas n'è anc betg fixà. Tant pli che la vischnanca burgaisa da Falera sto anc dar il consentiment uffizial per l'experiment.
