Ina consequenza dal virus è che surtut la gruppa da senioras e seniors periclitads ston star a chasa. Per gidar els fan ils voluntaris differents servetschs.
Noss patratg davostiers è da far insatge bun per insatgi.
Pussaivel da discurrer cun ils seniors
L’uniun da dunnas Laax fa cumissiuns, porta rauba frestga, charn dal mazler, medicaments ubain brevs. Las dunnas scalinian e deponian la rauba avant chasa, raquinta Simona Camathias, ch'è actuara da l’uniun da dunnas Laax. Ed era cun resguardar las reglas saja quai pussaivel da discurrer cun ils seniors.
Spitex, transports e controllar la deponia
Era l’uniun da giuventetgna Rabius sa gida ensemen cun l’uniun da giuventetgna Surrein. Perquai che pliras senioras e seniors ston star a chasa, han ils giuvenils era surprendì servetschs da la spitex sco da purtar il gentar, transportar persunas tar il medi u en l’ospital per far controllas. Spezial è ch’ils giuvens controlleschan era la deponia locala, sco Andri Bearth da l’uniun da giuventetgna Rabius di. Normalmain fetschian ils seniors questa lavur, mo uss na saja quai betg pussaivel pervia dal virus.
A l’entschatta avain nus constatà ch’i regia ina tscherta malsegirtad, perquai che nagin saveva co quai duai ir enavant.
Era Andri Bearth di ch’el saja stà malsegir, perquai ch’ins n'ha betg savì, sch’ils seniors veglian contact u betg.
Ina gruppa da 40 persunas gida
En Tujetsch è ina gruppa da 40 persunas sa furmada per gidar ils seniors: l’uniun da giuventetgna, l’uniun samaritana e giuvenils da Sedrun.
Ils seniors èn fitg engraziaivels e vulan pajar insatge. Ma nus faschain quai voluntari.
Silvan Decurtins da l’uniun da giuventetgna Tujetsch è persvadì ch’ins stoppia tegnair ensemen en temps da crisa.