Anc pli internaziunal?
Il gimnasi da la claustra fa gia parita internaziunala. Actualmain visitan trais scolars da la China il gimnasi da la claustra da Mustér. Els duajan dentant anc survegnir dapli collegas da l’exteriur. Tenor il rectur Bruno Hensler vul la scola empruvar da far vegnir scolars da l’Africa dal Sid, India, Corea dal Sid, Mexico, Namibia, Pologna, Italia ubain Germania a Mustér.
Las scolaras ed ils scolars ston avair en media almain ina nota da 5,5 (equivalent al sistem svizzer) ed en il rom flaivel 5,25. Vitiers vegn ch’els ston avair cumpetenzas socialas, vul dir els ston esser abels da viver lunsch davent da chasa.
Cuntanscher in nivel internaziunal
Il medem mument han era ils scolars indigens la chaschun d’emprender ad enconuscher autras scolas en l’exteriur respectivamain culturas estras. Proximamain van duas scolaras dal gimnasi a Mustér a Shanghai ed intgins scolars en l'Africa dal sid.
Cun questa mesira ha Mustér duas finamiras: Dad ina vart da cuntanscher a Mustér in gimnasi da nivel internaziunal per esser preparà per las universitads; da tschella vart d'egualisar cun scolars da l’exteriur il manco da scolars indigens.
RR actualitad 11:00