Siglir tar il cuntegn

Header

Navigaziun

Parasguladers.
Legenda: Parasguladers. RTR, H. Giger
cuntegn

Surselva Critica envers ils parasguladers

Dals 8 fin ils 15 d’avust s’inscuntra l’elita internaziunala da parasguladers a la cuppa mundiala a Mustér. 125 pilots cumbattan da sgular in tschancun da 40-120 km uschè spert sco pussaivel. La partenza è a Gendusas e l’arrivada a l’hotel Sax Lodge.

Mo ils chatschaders fan valair che questa concurrenza saja in grond problem per la selvaschina. Sco il guardiaselvaschina da la regiun Surselva, Werner Degonda, ha ditg ad RTR, pertutgia quai surtut chamutschs e capricorns. Las mammas fugian ed ils ansiels hajan difficultads da chattar puspè ellas. Mo tenor la lescha da chatscha na possian ils chatschaders betg scumandar quest eveniment, di Werner Degonda.

Il schef dal comité d’organisaziun da la concurrenza da parasguladers Martin Scheel di, ch’els hajan era observà che quai dettia problems per la selvaschina. Perquai hajan els prendì mesiras cun far zonas da protecziun.

Turissem profitescha

Mo la finala profiteschia il turissem da quest eveniment e na betg ils parasguladers. Perquai stoppian quels ed ils chatschaders tschertgar ina schliaziun, di Scheel.

Era il president da vischnanca da Mustér Francestg Cajacob conceda, ch’i dat in conflict tranter ils interess differents. Omaduas chaussas sajan dentant impurtantas, il turissem ed era la selvaschina. Perquai spera el ch’ins chattia insacura ina schliaziun.